Խաղաղապահներն ուժ կիրառելու իրավունք չունեն, եթե ուժ պիտի կիրառեին, ուրեմն թող դուրս գային․ ՔՊ-ական պատգամավոր

Խաղաղապահներն ուժ կիրառելու իրավունք չունեն, դրա համար էլ կոչվում են խաղաղապահ, խաղաղապահները եթե ուժ պիտի կիրառեին, ուրեմն թող դուրս գային, այսինքն՝ ամեն ինչ արվելու է օրենքի սահմաններում։ Այս մասին այսօր Ազային ժողովում լրագրողների հետ զրույցում ասաց ՔՊ խմբակցության պատգամավոր Հակոբ Ասլանյանը։ 

«Այո, ես հասկանում եմ, որ Արցախի ժողովուրդն այսօր շատ լուրջ խնդիրների առաջ է կանգնած, այդ խնդիրները միայն իրենցը չեն, մերն էլ են։ Հիմա մենք այսպիսի տարածաշրջանում ենք ապրում և ունենք այդպիսի սրիկա հարևաններ, որոնց հետ մշտապես խնդիրներ ենք ունեցել և մտածել, որ այդ խնդիրները միայն այսօր են, մանիպուլյացիա է։ Մենք այդ հարևանների հետ խնդիրներ ունենք արդեն մի քանի հարյուր տարի»։ 

Հարցին՝ եթե խաղաղապահներն ուժ կիրառելու մանդատ չունեն, իսկ հակառակորդն էլ անում է այնպիսի գործողություններ, որոնք բանակցություների միջոցով լուծվող չեն, Ասլանյանը պատասխանեց, որ բանակցություններով լուծվող են։ 

«Խաղաղապահներն իրավունք ունեն ուժը կիրառելու, եթե նրանք կրակելով են գալիս, եթե մարդը կրակելով չի գալիս, դու կրակելով չես կարող դիմակայել»,- ասաց Ասլանյանը։ 

Լրագրողի դիտարկմանը, թե եթե ադրբեջանցիները վրաններ են տեղադրել, մե՞նք էլ պետք է վրաններ տեղադրենք, որպեսզի համարժեք պատասխան լինի, եթե Ասլանյանն ասում է, որ հարցը պետք է օրենքով կարգավորվի, ադրբեջանցիներն օրենքո՞վ են փակել միջանցքը։

Իշխանական պատգամավորը դիտարկումը նախ պրովոկացիա համարեց, ապա սկսեց մեկը մյուսին հակասող, շփոթված պատասխաններ տալ։ 

«Ես ասացի օրենքով ենք անելու, ես ասացի թուրքը օրենքո՞վ է արել, մենք չգիտե՞նք, որ թուրքն օրենքով չի, մենք չգիտե՞նք թուրքին, եթե դուք չգիտեք, ես լավ գիտեմ»,- ասաց պատգամավորը, որի քաղաքական թիմը ամենօրյա զիջումների գնով Հայաստանը տանելու է թշնամու հետ կեղծ հաշտեցման։ 

Լրագրողները հակադարձեցին, թե իրենց իշխանությունն է թուրքի հետ խաղաղության օրակարգ ձևավորում։ Եվ հետո, նրա ասածներն իրար հակասում են։ Ի վերջո, սովորականի պես, խոսակցությունը կրկին բերվեց ընդդիմությանը և Արցախի անվտանգության երաշխավոր պետության իշխանական պատգամավորը ընդդիմությանն «ուղարկեց» Արցախ․ ինքն այնտեղ անելիք չունի։