Արցախում շրջափակման մեջ նաև հնդիկներ կան՝ իրենց երեխաների հետ․ Դավիթ Բաբայանը՝ հնդիկ լրագրողին

Հնդկաստանի հետ հարաբերությունների զարգացումը տարբեր ոլորտներում կարող է միայն դրական ազդեցություն ունենալ թե՛ մեզ, թե՛ Հնդկաստանի վրա։ Այս մասին այսօր Երևանում հրավիրված մամուլի ասուլիսում, պատասխանելով հնդկական լրատվամիջոցի համապատասխան հարցին, ասաց Արցախի ԱԳ նախարարի պաշտոնակատարը։ 

Դավիթ Բաբայանի խոսքով՝ Արցախում կան ազգությամբ հնդիկներ, ովքեր ամուսնացած են հայերի հետ և ունեն երեխաներ, և հիմա այս պահի դրությամբ նույնպես գտնվում են Ադրբեջանի կողմից շրջափակման մեջ։

«Եթե Հնդկաստանի կառավարությունը նույնպես կարծում է, որ պետք է արձագանքի, կապ չունի՝ հնդիկներ են ազգությամբ, թե ոչ, առհասարակ ցանկացած մարդ, որը հայտնվում է նման ծանր վիճակում, պետք է ստանա միջազգային հանրության կողմից համապարփակ գնահատական և պաշտպանություն»։