Դեղորայքը, բենզինը և դիզվառելիքն Արցախում մի քանի օրից կսպառվեն, 1100 մարդ մնացել է ճանապարհներին․ Արցախի ՄԻՊ-ն ահազանգում է

Արցախի ՄԻՊ Գեղամ Ստեփանյանն այսօր Երևանում կայացած մամուլի ասուլիսում խոսեց Արցախում ստեղծվելիք և արդեն ստեղծված հումանիտար խնդիրների մասին, որոնք ստեղծվել են ադրբեջանական հանցավոր գործողության հետևանքով։ 

«Այս պահի դրությամբ 24 և ավելի ժամ դադարեցված է սննդամթերքի, դեղորայքի, էներգակիրների և այլ անհրաժեշտ պարագաների մատակարարումն ամբողջ Արցախի տարածքում։ ՄԻՊ հաստատությունն ահազանգեր է ստանում, որ բժշկական հաստատություններում առկա դեղորայքային պաշարները մի քանի օրվա համար են և նման ձևով շարունակվելու դեպքում այս հարցում կանգնելու ենք շատ լուրջ խնդրի առաջ»,- ասաց Ստեփանյանը։

Նրա խոսքով՝ նույնը վերաբերում է սննդամթերքի և էներգակիրների մատակարարումներին, խոսքը բենզինի և դիզվառելիքի մասին է։ 1100 մարդ մնացել է ճանապարհներին ձմեռվա ցուրտ պայմաններում, այդ թվում՝ 270 երեխա, ովքեր կտրված են իրենց ընտանիքներից։

«Սա Ադրբեջանի կողմից իրականացվող էթնիկ զտման, ցեղասպանական քաղաքականության հերթական բաղադրիչն է։ Այն իրականացվում է հետևողական և համակարգված կերպով։ Սրանք 2020թ․ նոյեմբերի 9-ից հետո հաստատված հրադադարի դիտավորյալ խախտումներ են և ձեռք բերված պայմանավորվածությունների դիտավորյալ խաթարումներ են»,- նշեց Արցախի ՄԻՊ-ը։