Խռովված ՕԵԿ-ը

Կոալիցիոն պատմություննները կրկնվում են, դերակատարներն էլ նույնն են՝ ՀՀԿ-ԲՀԿ-ՀՅԴ, խռովում են, բաժանվում` հետո միանում: Միայն թե այս անգամ ՕԵԿ-ը սցենարից դուրս է: Դաշնակցությունն արդեն սկզբունքորեն որոշել է կոալիցիա կազմել, ԲՀԿ –ն էլ հրավերի է սպասում: Արդեն այսօր հանրապետականների կողմից Խոսրով Հարությունյանի շուրթերով հնչեց՝ ԲՀԿ-ին գուցե կոալիցիայի մաս կազմելու առաջարկ արվի, իսկ ՕԵԿ-ին` դժվար թե: ՕԵԿ-ականներն էլ Դուբայում մի լավ քեֆ անելուց հետո, դեռևս իրադարձությունները տնտղում են, կոալիցիայի վերաբերյալ հարց լսելուց էլ` վրդովվում:

«Մեզ կոալիցիա մտնելու առաջարկ չեն արել, չեն էլ կարող անել»,-newspress.am-ի հետ զրույցում ասաց ԱԺ ՕԵԿ խմբակցության ղեկավար Հեղինե Բիշարյանը: Նա անտրամաբանական համարեց այն, որ իրենց կոալիցիայի վերաբերյալ հարցեր են տրվում. «մենք կոալիցիայում եղել ենք ու դուրս ենք եկել, այլևս չենք մտնի»:

Բիշարյանի դիտարկմամբ՝ կոլացիա ինքնանպատակ չպետք է կազմել, կոալիցիան արդյունավետ է այն ժամանակ, եթե քաղաքական որոշումների վրա ազդեցության հնարավորություն կա:

Բիշարյանը մոռացել է, որ թե Քոչարյանի, թե Սերժ Սարգսյանի օրոք կոալիցիա մտնելու առաջարկը ՕԵԿ-ը միանգամից ընդունել է:

Հեղինե Բիշարյանից փորձեցինք հետաքրքրվել նաև Արթուր Բաղդասրայանի որդու հարսանեկան խնջույքից, որին Բիշարյանը ևս մասնակցել է: Վերջինս պատասխանեց, որ նմանատիպ թեմաների վերաբերյալ խոսել չի ուզում:

«Արթուր Բաղդասարյանն այդ թեման փակել է» ,-եզրափակեց նա: