Դա նույնն է, որ փորձենք դինոզավրերի ֆերմա ստեղծել. Փաշինյանի խոսքը ծիծաղ առաջացրեց ԱԺ դահլիճում (տեսանյութ)

Այսօր Հայաստանում կան գյուղատնտեսական բիզնեսով զբաղվող ընկերություններ, որոնք Եվրչոպայից ժամը 700 եվրոյով մասնագետ են հրավիրում, որպեսզի իրենց խորհուրդ տա, թե ինչպես մոշ կամ ելակ կամ տանձ, կամ ծիրան աճեցնել: Այս մասին ԱԺ-ում կառավարության հետ հարցուպատասխանի ժամանակ ասաց Նիկոլ Փաշինյանը՝ անդրադառնալով հարցին, որ գյուղական համայնքներում չկան անասնաբույժներ և այլ մասնագետներ:

«Ինչու այն տեղերում, որտեղ ժամը 700 եվրոյով աշխատանքի կարիք կա, այնտեղ էլ մասնագետները չեն գնում: Այս դիլեմաները մեր խորին համոզմամբ հնարավոր է լուծել միայն բուհական համակարգի խորը եւ համապարփակ բարեփոխումների միջոցով:

«Պլանի գլխում» 21-րդ դարում ունենալ Ագրարային համալսարան, դա նոնսենս է, որովհետեւ ժամանակակից բոլոր ագրարային համալսարանները շրջապատված են ոչ թե այլ շենքերով, հյուրանոցներով, սրճարաններով, այլ շրջապատված են հարյուրավոր հեկտարներով հողատարածքներով, որտեղ կան ֆերմաներ, այգիներ, էքսպերիմենտալ տարածություններ։

Նաև սա է պատճառը, որ մենք մշակում ենք իրականացնելու համար ակադեմիական քաղաքի գաղափարը, որտեղ համոզված կլինենք, որ պատրաստվում են պատշաճ մասնագետներ, պատշաճ մեխանիզմներով պետությունը խթանում է նրանց ծառայությունները հասանելի դարձնելու ուղղությամբ»,- նշեց Փաշինյանը:

Նրա խոսքով՝ գյուղատնտեսությունը, որը մենք ունենք, հեռանկար չունի. «Ամեն տեղ տանենք հինգ անասնաբույծ, վեց անասնաբույժ կանգնեցնենք, այդ գյուղատնտեսությունը այդ մեթոդաբանությամբ չունի հեռանկար։ Դա մոտավորապես նույնն է, եթե մենք փորձենք, կներեք էլի, ես մեկ-մեկ սուր բաներ եմ ասում, հետո փոթորիկներ են առաջանում, դինոզավրերի ֆերմա ստեղծենք։ Մանավանդ, այդպիսի չհաջողված փորձեր արդեն ունեցել ենք»։

Փաշինյանի խոսքը առաջացրեց դահլիճում ներկաների ծիծաղը:

Մանրամասները՝ տեսանյութում: