Աչքերիս 4 անգամ արցունքաբեր գազ են փչել. ականատեսը մանրամասներ է հայտնել պարեկների և քաղաքացիների ծեծկռտուքի մասին

Վանաձորում նոյեմբերի 25-ին պարեկների և քաղաքացիների միջև տեղի ունեցած ծեծկռտուքի ժամանակ վնասվածք ստացած Ռադիկ Ավետիսյանը մինչև հիմա հիվանդանոցում է: Այս մասին NEWS.am-ի հետ զրույցում ասաց ծեծկռտուքին ականատես, Ավետիսյանների հարազատ Արեն Ջերոյանը։

«Ռադիկի թոքերում հեղուկ է լցվել, կողերն են ցավում, բուժում է ստանում։ Մինչև այսօր մենք հիվանդանոցում ենք, տեսել ենք, որ պարեկներ են եկել, նկարվել ու գնացել են, բայց որևէ մեկի վրա վնասվածք կամ հետք չկար։ Դեպքից անցնում է մի քանի օր, պարեկները նոր գալիս են հիվանդանոց»,- պատմեց Արեն Ջերոյանը։

Ծեծկռտուքի երկու կողմերն էլ՝ վանաձորցիները և պարեկները, վստահեցնում են, որ իրենք են տուժող կողմը:

«Մենք 3 հոգով ենք եղել, չէինք կարող 40 պարեկի ծեծել։ Միայն հորեղբայրն է մետաղյա ձող վերցրել իր ձեռքը, երբ տեսել է, որ անչափահաս տղային ծեծում են։ Մենք չէինք կարողանում տեսնել, թե ինչ է կատարվում, հենց աչքերս բացում էի, արցունքաբեր գազ էին փչում։ Աչքերիս 4 անգամ արցունքաբեր գազ են փչել»,- ասաց Ջերոյանը։

Միջադեպը տեղի էր ունեցել այն բանից հետո, երբ պարեկները փորձել էին ճանապարհն ազատել Տավուշ մեկնող Նիկոլ Փաշինյանի ավտոշարասյան համար։ Պարեկներից մեկի և տարեց վարորդի միջև վիճաբանություն էր ծագել, ինչին միջամտել էր նաև նրա որդին: Ականատեսների խոսքով՝ ավելի ուշ հաշվեհարդար տեսնելու նպատակով պարեկներն այցելել էին նրանց աշխատավայր և ծեծի ենթարկել նրանց։