Եթե ճանաչենք Արցախի անկախությունը՝ անհարմարություն կստեղծենք միջնորդ պետությունների համար․ Հովիկ Աղազարյան

ՔՊ-ական պատգամավոր Հովիկ Աղազարյանն այն համոզմունքին է, որ անկախ նրանից՝ Հայաստանի ԱԺ-ն կընդուներ ընդդիմության ներկայացրած հայտարարությունը, թե ոչ, Ադրբեջանը սադրանքների դիմելու է։

Նա վստահեցնում է, որ ընդդիմության առաջարկած հայտարարությունը խորհրդարանի մակարդակով ընդունելու դեպքում, անհարմարություն կառաջացներ, իր իսկ որակմամբ, համակիր պետությունների շրջանում։

«Եթե մենք այդ հայտարարության տեքստը սեղմեինք, տեղավորեինք շատ կարճ տեքստի մեջ, ապա այն պետք է լիներ հետևյալը. Հայաստանի ԱԺ-ն ճանաչում է Արցախի Հանրապետության անկախությունը: Ուրեմն թող այդ տեսքով բերեին, դրանք համարժեք բաներ էին: Եթե դու ճանաչում ես Արցախի Հանրապետության անկախությունը, նշանակում է՝ դու փակում ես բանակցային գործընթացի դռները ոչ թե Ադրբեջանի, այլ նաև միջնորդ երկրների հետ: Հետևաբար, ճիշտ չէ, որ այսօր Հայաստանը ճանաչի Արցախի անկախությունը: Դա հասկանում են նաև մեր ընդդիմադիր գործընկերները, դրա համար էլ հենց այդ ձևակերպումներով էին բերել»,- ԱԺ-ում լրագրողների հետ զրույցում հայտարարեց Հովիկ Աղազարյանը: