Ձեր վարչությունը կարգի հրավիրեք, բամբասանքներն էլ թարգեք, ասում են՝ քաղաքապետը թեմաների մեջ ա. Հրաչյա Սարգսյան (տեսանյութ)

«Դուք մեր «Բնակչության հատուկ սպասարկման» ՀՈԱԿ գնացե՞լ եք, հանձնարարական ունեիք չէ՞, որ պետք է գնայիք այդտեղ»։ Այս հարցը Երևանի ավագանու նիստի ժամանակ քաղաքապետարանի վերահսկողության վարչության պետի պաշտոնակատար Վահան Արսենյանին ուղղեց քաղաքապետ Հրաչյա Սարգսյանը:

Վերջինս բացասական պատասխան տվեց և նշեց, որ գերեզման են գնացել։

«Հասկացա՝ ՀԱՈԿ չեք գնացել, գնացել եք գերեզմանատուն»,-արձագանքեց Հրաչյա Սարգսյանը:

Վարչության պետի պաշտոնակատարը հայտնեց, թե անհրաժեշտություն կա, որ նաև ՀՈԱԿ-ում ուսումնասիրություն անեն:

«Դե խնդրում եմ՝ ինչ պետք է, այսօր ուշադիր վերահսկողությունն արեք: Ձեր աշխատակիցներն էլ, չգիտեմ, խոսում են՝ քաղաքապետը թեմաների մեջ է, մեզ էլ ուղարկել է այնտեղ, իրեն թվում է, թե մենք չգիտենք որն է…»,- ասաց Սարգսյանը և վարչության պետին հանձնարարեց. «Ուրեմն, շատ ուշադիր ուսումնասիրություն եք անում, որ այդ թեմաները բարձրաձայնեք»:

Վահան Արսենյանը հայտնեց, որ ցանկանում է հասկանալ, թե որ աշխատակիցն է եղել և ինչ է խոսել:

«Կոնկրետ ձեզ կասեմ, թե ով է եղել: Ձեր վարչությունում է, ուրեմն ձեր վարչությունն կարգի հրավիրեք: Էդ բամբասանքներն էլ թարգեք ընդհանրապես քաղաքապետարանում»,- հայտարարեց Երևան քաղաքապետը:

Ասրյանը արձագանքեց, որ տեղյակ չէ, թե որտեղից են նման խոսակցությունները:

«Շատ վատ է, որ անտեղյակ եք»,- Վերահսկողության վարչության պետի պաշտոնակատարին ասաց Հրաչյա Սարգսյանը: