Հյուրերին կզարմացնի, թշնամուն կուրախացնի․ 8000 անցք ու ճեղք՝ կառավարության շենքի ճարտարապետական կոթողների վրա՝ լույսեր կախելու համար (տեսանյութ)

Վարդագույն ֆելզիտային տուֆով՝ բազալտե գետնախարիսխի վրա կառուցված կառավարության շենքի հեղինակը ճարտարապետության ակադեմիկոս, ՀՍՍՀ ժողովրդական ճարտարապետ Ալեքսանդր Թամանյանն է։

Անկեղծ, դժվար է պատկերացնել, թե ինչ կզգար նա, եթե ողջ լիներ ու տեսներ, թե ինչպես են մեխ առ մեխ ծակում, փչացնում ու ճաքեր ավելացնում տարիների խորքից մեզ փոխանցված այս ճարտարապետական կոթողի վրա։

Չգիտես՝ կառավարության անդամները՝ իրենց ղեկավար Նիկոլ Փաշինյանի հետ, իրականում Հայաստանում անցկացվելիք մանկական «Եվրատեսիլ»-ի հյուրերի՞ն են փորձում զարմացնել, թե՞ պարզապես իրենց թուրք-բաշիբոզուկ «եղբայրների» նման կառավարությունը նպատակ ունի ոչնչացնել Երևանի պատմամշակութային շինությունը։

Այնպիսի տպավորություն է, որ մեխերի փոխարեն փամփուշտներ են սեպել շենքի զարդանախշերի վրա։

Որոշ տվյալների համաձայն՝ ճարտարապետական այս կոթողի վրա լույսեր կախելու համար բացել են 8000 անցք։

Հազիվ թե գործող պատկան մարմինները չպատկերացնեին, որ ճարտարապետական գեղեցիկ լուծմամբ փորագրված զարդանախշերի վրա յուրաքանչյուր մեխը կարող է ճակատագրական լինել այդ շինության հետագա գոյատևման համար։ 

Այստեղ հարցն այն է, թե տեղյա՞կ են պահել նրանք այդ մասին իրենց ղեկավար Փաշինյանին ու նա ամեն դեպքում որոշել է ծակել-փչացնե՞լ, թե՞ «գյադեքի» նման միայն հրամանով «էս կողմ-էն կողմ» գնացող-եկող, տանող-բերող են։

Թեև մյուս կողմից էլ, դժվար թե Փաշինյանն ինքն այդ մասին անձամբ չիմանար։ Ի վերջո, ժամանակին որպես լրագրող, այնուհետև որպես ընդդիմադիր քաղաքական գործիչ ու պատգամավոր, հենց նման ծակուծուկերին խփված մեխերից էր կախվում ու սկսում փորփրել այնքան, մինչև չքանդեր ու չհասներ նպատակակետին․․․

Այլ հարց է, թե այդ պահին որն էր իր նպատակակետը՝ «ոչինչ չգտած»  ձևանալն ու «սիրով» այդ մասին լռե՞լը, թե՞ իր գտած անցքը փակելը․․․

Հիմա նա ինքն է ծակուծուկ փակող-բացողն ու ջարդուփշուր է անում՝ առանց աչք թարթելու։

5 միլիարդ դրամ հատկացրել է՝ «Եվրատեսիլ»-ի հյուրերին զարմացնելու համար, 5 մլրդ դրամի ու ավելի հաճույք էլ կպատճառի թշնամուն՝ նրանց աչքը շոյելով ու կառավարության շենքի վրա «փամփուշտներ» խրելով․..

Արմինե Մկրտումյան