Հանքերի տրամադրումը թանկացնելո՞ւ են

Միջազգային զարգացման գործակալությունը կաջակցի Հայաստանի կառավարությանը հանքարդյունաբերության ոլորտում թափանցիկության բարձրացմանը նպաստելու համար: Այս մասին որոշումը հաստատվեց գործադիրի այսօրվա նիստում:

Հայաստանի և ԱՄՆ-ի կառավարությունների միջև 2015թ-ին ստորագրված փաստաթղթով իրականացվելու է Հայաստանում «Հանքարդյունաբերության ոլորտի թափանցիկության բարելավում» դրամաշնորհային ծրագիրը, որի նպատակն է օժանդակել ՀՀ կառավարությանը` հանքարդյունաբերության ոլորտի թափանցիկության և հաշվետվողականության խթանմանն ուղղված ջանքերի իրագործման հարցում:

Գործադիրի այս ձևակերպումից կարող ենք արձանագրել, որ նորանկախ Հայաստանի հանքարդյունաբերությունը ոչ թափանցիկ է եղել, և ոչ էլ հաշվետվողականություն է իրականացվել: Կառավարությունը աջ ու ձախ երբեմն կոպեկներով բաժանելով ՀՀ ընդերքի հարստությունը, հիմա էլ որոշել է «թափանցիկ» աշխատել: Այսինքն, այն, ինչ դեռևս մնացել է, ավելի բարձր գներով է տրամադրվելու հանքարդյունաբերողներին, քանի որ հանքերի հիմնական մասը արդեն սեփականատեր ունի, հետևաբար ում համար է լիենլու թափանցիկությունը:

Գործադիրը որոշել է երկրորդ նապաստակն էլ խփել, այն է` հատկացվող միջոցներն ուղղվելու են «Հանրապետական երկրաբանական ֆոնդ» ՊՈԱԿ:

Երբ արդեն բաժան-բաժան են արել ՀՀ ընդերքը, սրանից հետո որոշել են համակարգել ու հասկանալ` ինչ մնացել է համատարած թալանից հետո, որ դրամաշնորհ հատկացվի: ՀՀ կառավարությունը առանց դրամաշնորհի անգամ մատը չի շարժի:

Նշենք, որ ծրագրի իրականացման համար նախատեսվել է 356 հազար 205 դոլար ընդհանուր բյուջեով: