Ի՞նչ ակնկալիք կարող ենք ունենալ Քրքորյանի կտակից

Մամուլում շրջանառվում է, որ օրերս գաղտնիության պայմաններում բացվելու է անցած տարվա հունիսի 16-ին մահացած ամերիկահայ գործարար, ՀՀ ազգային հերոս Քըրք Քրքորյանի կտակը։ Նա կտակել է վաճառել իր ամբողջ ունեցվածքը եւ գոյացած գումարն ուղղել բարեգործության։ Ըստ կտակի՝ պետք է ունեցվածքի վաճառքից գոյացած գումարով իրականացվի այն բոլոր ծրագրերի ֆինանսավորումը, որոնք կյանքի են կոչվել Քրքորյանի կենդանության օրոք։ Կտակից օգտվելու ակնկալիք կարող են ունենալ միայն այն կազմակերպությունները, որոնք նախկինում Քրքորյանի հիմնադրամներից օժանդակություն ստացել են։ Արդեն իսկ կտակն իրագործելու նպատակով ԱՄՆ-ում հատուկ գրասենյակ է բացվել:

Newspress.am-ի հետ զրույցում Երևանի քաղաքապետարանի «Բարև Երևան» խմբակացության անդամ, ԱԺ նախկին պատգամավոր Անահիտ Բախշյանը ասաց, որ չենք կարող հստակ ասել Հայաստանը կտակից մասնաբաժին կունենա՞ն, թե՞ ոչ: Բայց գաղտնիք չէ, որ Լինսի հիմնադրամը Հայաստանում փակվեց անարդյունավետ, ուռճացված ծախսերի պատճառով: Անահիտ Բախշյանը նաև ասաց, որ ԱԺ-ում 2011թ-ի զեկույցը բավարար է միայն ասելու, որ Լինսի գումարները փոշիացվել են: Բախշյանը նաև մի դրվագ հիշեց ԱԺ ներկայացված զեկույցից, ըստ որի այդ գումարով իբր վերանորոգվել է 11 դպրոց, բայց  ընդամենը ութն է վերանորգված եղել:

«Սա լույսի պես պարզվեց, որից հետո հետևեցին Քրքորյանի քայլերը` փակել Լինսի հիմնադրամը: Կարծում եմ պատահական չէր»,-նկատեց Բախշյանը:

Հիշեցնենք 2011թ-ի տարեսկզբին հայտնի դարձավ, որ ամերիկահայ բարերար Քըրք Քըրքորյանը լուծարում է «Լինսի» հիմնադրամը, որն իր գոյության 22 տարիների ընթացքում Հայաստանում իրականացրել է ավելի քան 1 միլիարդ դոլարի բարեգործական ծրագիր: Խոսակցություններ էին շրջանառվում, թե բարերարը նեղացած է Հայաստանի իշխանություններից: Հիմնադրամի լուծարմից հետո հաշվի վրա մնացած 200 միլիոն դոլարը ոչ թե Հայաստանին, այլ Կալիֆորնիայի համալսարանի Լոս Անջելեսի մասնաճյուղին նվիրաբերվեց: