Հունվարի 1-ից ջրի սակագինը կբարձրանա՝ դառնալով 208,42 դրամ (տեսանյութ)

ՀՀ հանրային ծառայությունները կարգավորող հանձնաժողովն այսօրվա նիստում սահմանել է «Վեոլիա Ջուր» ՓԲԸ-ի կողմից բաժանորդներին խմելու ջրի մատակարարման և ջրահեռացման (կեղտաջրերի մաքրման) ծառայությունների մատուցման 2023 թվականի սակագները:

Նիստի ժամանակ ՀԾԿՀ սակագնային քաղաքականության վարչության պետ Աշոտ Ուլիխանյանը հայտարարեց, որ սակագինը կբարձրանա, սակայն սոցիալապես անապահով բաժանորդների համար 2023 թվականին սակագինը կմնա անփոփոխ՝ 180 դրամ, իսկ մյուս բաժանորդների համար՝ 208,42 դրամ, քանի որ մեկ տարի պետությունը կփոխհատուցի։

Աշոտ Ուլիխանյանի խոսքով, խմելու ջրի սակագինը բարձրանալու է՝ պայմանավորված 4 հանգամանքով․

1․ մանրածախ ջրամատակարարման ծավալի փոփոխությունը՝ կանխատեսված բազիսային ծավալի նկատմամբ,

2․ սղաճը

3․ ընկերությանը մատակարարվող էլեկտրաէներգիայի սակագների փոփոխությունը,

4․ ջրային համակարգն այլ նպատակներով օգտագործելը։

Նրա խոսքով՝ բացի վերը նշված չորս գործոններից, որևէ այլ գործոն բազիսային սակագների վրա ազդեցություն չի ունենում։

«2023 թվականին փոփոխված բազիսային սակագինը յուրաքանչյուր խորանարդ մետրի համար ամրագրված է 183,6 դրամ, սկզբնական 212, 4 դրամի փոխարեն, որն էլ ենթակա է ճշգրտման։ Համաձայն վարձակալության պայմանագրի, «Վեոլիա ջուր» ընկերության լիցենզիայի պայմանների՝ ընկերությունը պարտավոր է մրցույթի արդյունքում ձևավորված և լիցենզիայի պայմաններով ամրագրված բազիսային սակագների ճշգրտման նպատակով յուրաքանչյուր տարի դիմել հանձնաժողով։ Ընկերությունը հաշվի առնելով գործող իրավակարգավորումները վարձակալության 7-րդ տարում, այսինքն՝ 2023 թվականի համար ամրագրված բազիսային սակագնի ճշգրտման նպատակով այս տարի օգոստոսի 8-ին հերթական անգամ հայտ է ներկայացրել հանձնաժողով։ Մասնավորապես, ընկերության կողմից մանրածախ մատուցվող ծառայությունների գումարային ճշգրտված սակագինը հաշվարկվել և բոլոր սպառողների համար առաջարկվել է 209 դրամ մեկ խորանարդի համար»,- շեշտեց նա։