Արտակարգ իրավիճակ՝ Երևանում. ջուրն անխնա հոսում է՝ վնասելով բնակիչների տները, իսկ պատկան մարմինները տեղում դոփում են

Այն, որ վերջին ժամանակահատվածում մայրաքաղաքում չեն դադարում բնակիչների կողմից ստացվող ահազանգերը` կապված Երևանի քաղաքապետարանի ու «Վեոլիա Ջուր» ընկերության ոչ բարեխիղճ աշխատանքների մասին, գաղտնիք չէ։

Երեկ՝ նոյեմբերի 25-ին, shamshyan.com էին դիմել Կենտրոն վարչական շրջանի Նորագյուղի բնակիչները, ովքեր արդարացիորեն բարձրաձայնում են, որ երկար ժամանակ է Երևանի քաղաքապետարանը, Կենտրոնի թաղապետարանը, «Վեոլիա Ջուրն» իրենց դրել են «խլամ հեռախոսի» տեղը։

Առողջական խնդիրների մեջ հայտնված նորագյուղցի բնակչուհին ասել է. «10 օր է՝ խմելու ջուրը հոսում ու իր սև գործն է անում մեր թաղամասում։ 10 օր է՝ սպասում ենք, թե ով է հանգուցալուծելու Նորագյուղի 63/2 տան և դրա հարևանությամբ անխնա հոսող խմելու ջրի դեմն առնելու պրոբլեմը։ Քաղաքապետարանը գցում է թաղապետարանի վրա, թաղապետարանը՝ «Վեոլիա ջրի» վրա, լրիվ մտել են «Կարապետը՝ Հայրապետին, Հայրապետը՝ մայրապետին», ու չեն փորձում խնդիրը լուծել։ Ջուրն անխնա հոսում է, բայց մեր չինովնիկներին չի մտահոգում դա։ Քաղաքապետարանն ու թաղապետարանը թողնես միայն ամպագոռոռ հայտարարեն, թե մենք սիրում ենք երևանցիներին։ «Վեոլիա Ջուրն» էլ թողնես հայտարարի՝ մենք էլ սիրում ենք մեր սպառողին։ Եթե այս կերպ եք սիրում բնակչին ու սպառողին, ուրեմն հարամ ըլնի էդ սերը, ձյուն գա ձեր գլխին։ Բնակիչներով ձեր ոչ սրտացավ ու աշխատանքին չնվիրվելու պատճառով արդեն չգիտենք՝ ինչ է սպասվում մեզ։ 21-րդ դարում հայտնվել ենք ասես քարե դարում։ Տան պատերը խոնավացել են ու տներում նամշահոտ է տիրում։ Մի քանի ժամվա խնդիր է, եթե մի փոքր սիրեք երևանցուն, մի փոքր սիրեք սպառողին, ապա հարցը կկարգավորվի։ Գոնե հիմա մտածեք այդ մասին, պարոնա՛յք չինովնիկներ»։

Ֆոտոլրագրողը հայտնում է նաև որ եթե Երևանի քաղաքապետ Հրաչյա Սարգսյանը, Կենտրոն վարչրական շրջանի ղեկավար Սամվել Ղուկասյանն ու «Վեոլիա Ջուր» ընկերության ղեկավարությունը հավատարիմ են մարդ լինելու կոչմանը, ապա այս անօգնական մեծահասակ մարդկանց խնդիրն արագ կկարգավորեն, հակառակ դեպքում նրանք կարժանանան բնակիչների ու սպառողների նախատինքներին՝ բառի ամենավատ իմաստով։