Տեղի ունեցան կոխլեար իմպլանտացիայի առաջին վիրահատությունները MED-EL-ի գերժամանակակից իմպլանտներով (լուսանկարներ)

2008 թվականից գործող «Հայկական քիթ-կոկորդ-ականջաբանների ասոցիացիան» յուրաքանչյուր տարի կազմակերպում է գիտաժողով, որտեղ հավաքված ԼՕՌ մասնագետները կիսվում են իրենց փորձով, խոսում ժամանակակից ախտորոշման մեթոդներից, քննարկում առանձին կլինիկական դեպքեր, պատմում իրենց ձեռքբերումների մասին:

Օրերս կայացավ նաև այս տարվա սիմպոզիումը, որին ներկա էին ոչ միայն հայ, այլ նաև ԼՕՌ ոլորտի ներկայացուցիչներ Ռուսաստանից և Ավստրիայից: Այս տարի գիտաժողովը հիմնականում նվիրված էր ականջի հիվանդությունների ախտորոշման նորագույն մեթոդներին և ժամանակակից վիրաբուժական բուժումներին: Բայց անդրադարձ եղավ նաև տոնզիլոֆարինգիտներին, քթի տարբեր պաթոլոգիաներին և ժամանակակից հակաբիոտիկների օգտագործմանը:

«Հայկական քիթ-կոկորդ-ականջաբանների ասոցիացիայի» կազմակերպած տարեկան սիմպոզիումի գլխավոր նորարությունն այն էր, որ Հայաստան պաշտոնապես մուտք գործեց MED-EL ավստրիական ընկերությունը: Վերջինս աշխարհում ականջի ներխխունջային իմպլանտներով հայտնի ընկերություն է, որը աշխատում է ավելի քան 4000 բժշկական կենտրոնների հետ: Կեսդարյա պատմություն ունեցող ընկերության նպատակն է՝ օգնել լսողության խնդիր ունեցող մարդկանց ապրելու լիարժեք կյանքով. լսել, խոսել և երաժշտություն վայելել: Եվ արդեն իսկ Հայաստանում կատարվեց առաջին վիրահատությունները MED-EL ընկերության իմպլանտներով «Շենգավիթ» բժշկական կենտրոնում: Դրանք իրականացրեց Մոսկվայից ժամանած հայտնի ԼՕՌ վիրաբույժ, պրոֆեսոր Դիաբ Հասան Մուհամեդ Ալին և բ․գ․դ․ պրոֆեսոր, ԼՕՌ վիրաբույժ, քիթ-կոկորդ-ականջաբանության գծով ՀՀ ԱՆ խորհրդատու Արթուր Շուքուրյանը: Իսկ պրոցեսորի ծրագրավորումն իրականացրել են Լսողության ակադեմիայի տնօրեն, ԼՕՌ բժիշկ Արմինե Մարտիրոսյանը և MED-EL ընկերության ներկայացուցիչը:

Արթուր Շուքուրյանը պատմեց, որ վիրահատել են 17 և 53 տարեկան հիվանդների, որոնց մոտ ախտորոշվել է 4-րդ աստիճանի սենսոնևրալ ծանրալսություն. «MED-EL ընկերության ներխխունջային իմպլանտները տարբերվում են իրենց ժամանակակից հնարավորություններով, դիզայնով և օգտագործման պարզությամբ, բայց միևնույն ժամանակ ձայնի ավելի մեծ դիապազոնի ընդգրկումով: Սա շատ լավ հնարավորություն է մեր ազգաբնակչության համար, և ես հույս ունեմ, որ մեր համագործակցությունը MED-EL-ի հետ կլինի երկարատև»: Նույն հույսը ունի նաև MED-EL ընկերության փոխնախագահ Ալեքսեյ Իլչենկոն: Ասում է՝ սա իրենց առաջին պաշտոնական այցն է Հայաստան, թեպետ իրենց գործունեության ընթացքում շատ հայ հիվանդներ են ունեցել, որոնց վիրահատել են Եվրոպայում կամ Ռուսաստանում. «Մեր ներխխունջային իմպլանտների առաձնահատկությունն այն է, որ լսողության խնդիր ունեցող մարդիկ կարողանան ոչ միայն լսել և խոսել, այլ նաև մեծ հաճույք ստանան երաժշտությունից. նվագեն երաժշտական գործիքների վրա և երգեն: Դա այն է, ինչով մենք հպարտանում ենք, ինչին մենք հասել ենք»:

Լսողության խնդիր ունեցողները մինչ վիրահատությունը ախտորոշում ստացել են Լսողության ակադեմիայում և հենց այստեղ էլ ընթացել է վիրահատության նախապատրաստական աշխատանքները, ասում է ակադեմիայի տնօրեն Արմինե Մարտիրոսյանը:

Մեկ տարի առաջ բացված Լսողության ակադեմիան Ռուսասատանի Դաշնության «Академия Слуха»-յի մասնաճյուղն է Հայաստանում: Արմինե Մարտիրոսյանը իրենց կենտրոնի փորձը աչքի առաջ ունենալով՝ վստահաբար ասում է, որ լսողության խնդիրի լուծումը մեր երկրում պրոֆեսիոնալ մակարդակով է իրականացվում. «Հայաստանում կա մասնագիտացված մի կենտրոն, որտեղ դիմած լսողության խնդիր ունեցող մարդը ստանում է լիարժեք և համապարփակ բժշկական մասնագիտական օգնություն. ախտորոշում, բուժում, լսողապրոթեզավորում, լսողական սարքերի լայն ընտրություն, ծրագրավորում և սարքերի հետ կապված տարբեր աքսեսուարներ: Մենք ունենք արտասահմանյան մասնագետների հետ փորձի փոխանակման մեծ հնարավորություններ, Հայաստան ենք ներմուծում նորագույն տեխնոլոգիաներ՝ թե գիտական թե սարքերի տեսակետից»:

«Հայկական քիթ-կոկորդ-ականջաբանների ասոցիացիայի» կազմակերպած գիտաժողովին մասնակցում էր նաև Ռուսասատանի Դաշնության «Академия Слуха»-յի և «Աուրիկա» ընկերության տնօրեն Մաքսիմ Մուրզինովը:

Գիտաժողովին ընկերությունը ներկայացրեց իրենց արտադրած Ատոմ լսողական սարքի վերջին տարբերակի առանձնահատկությունները ու դրա կարողությունները: Այն թվային լսողական սարք է, մեծ և լայն հնարավորություններով, որը լիարժեք կվերականգնի հիվանդի լսողությունը: Այն հնարավոր է աշխատացնել բջջային հեռախոսի հավելվածների միջոցով, միացնել հեռուստացույցին, պարզ և ընկալելի լսել ձայնը աղմկոտ միջավայրներում՝ ապահովելով բարձր որակ և ավելի լավ կոմֆորտ: Դրանք իրենց դիզայնով շատ փոքր են և նուրբ: Լսողական սարքը այսուհետ առկա կլինի նաև Լսողության ակադեմիայում, ասում է պարոն Մուրզինովը. «Ամփոփելով հայաստանյան համագործակցության արդյունքները, կարող եմ ասել, որ մենք շատ գոհ ենք դրանից:

Մեզ այստեղ օգնում են շատ փորձառու և պրոֆեսիոնալ մասնագետներ և վստահաբար կարող եմ ասել, որ դիմելով Լսողության ակադեմիա դուք կստանաք պրոֆեսիոնալ մոտեցում, ձեզ համար կընտրեն ճիշտ լսողական սարքեր, կկատարեն ճիշտ ծրագրավորում՝ բարձրացնելով ձեր կյանքի որակը: Արդեն պլանավորում ենք հաջոդ տարի Հայաստանում ընդլայնել լսողական սարքերի վաճառքը՝ բացելով ևս 3 կենտրոն Երևանում, 2 կենտրոն էլ Հայաստանի մյուս խոշոր քաղաքներում»:

Գիտաժողովը անցավ ակտիվ և արդյունավետ քննարկումներով ու երկխոսությամբ: Հավաքված ԼՕՌ մասնագետները ինֆորմացվեցին մի շարք նորարություններին՝ թե լսողապրոթեզավորման, թե ախտորոշման և բուժման տեսանկյունից;