49-ամյա տղամարդուն հոգեբուժարանում հիվանդապահը դաժանորեն ծեծել է․ փաստաբանը պահանջում է տրամադրել դեպքի վայրի տեսագրությունը

Հոգեկան առողջության պահպանման ազգային կենտրոնի (Նուբարաշեն) հիվանդապահ Գոռ Անտոնյանը դաժան ծեծի է ենթարկել կենտրոնի պացիենտներից մեկին։ Այս մասին ասուլիսի ժամանակ ասաց փաստաբան Արմինե Դավթյանը։

Փաստաբանը պատմեց, որ նոյեմբերի 10-ին հիվանդապահներից մեկը, ով նախկին ոստիկան է և վատ հարաբերություններ է ունեցել իր պաշտպանյալի հետ, առավոտյան սպառնացել է վերջինիս։ Ըստ փաստաբանի, հիվանդասենյակում կոնֆլիկտ է ծագել այլ բուժվողների միջև, իր պաշտպանյալը քնած է եղել, արթնացել է, միջամտել, ինչից հետո հիվանդապահն է եկել ու բռնություն գործադրել։

«Երկու հիվանդ քաշքշել են իրար, ընկել են իմ պաշտպանյալի վրա, նա քնից արթնացել է ու փորձել է բաժանել նրանց։ Այդ պահին հիվանդասենյակ է մտել Գոռ Անտոնյանը և սեռական բնույթի հայհոյանքներ տալով` հարձակվել է իմ պաշտպանյալի վրա, բռնել գլուխը ու հարվածել երկաթե մահճակալին, ապա մի ոտքը դրել է որովայինին, մյուս ոտքով ու ձեռքերով հարվածներ է հասցրել մարմնի տարբեր մասերին»,– նշեց փաստաբանը։

Մյուս հիվանդները փորձել են օգնել տուժածին, քաշել են նրան, ինչի արդյունքում Գոռ Անտոնյանի հարվածներից մեկը դիպել է երկաթե մահճակալին։ Վերջինիս ձեռքը կոտրվել է։

Խնդրին անդրադառնալով՝ ՄԻՊ աշխատակիցը հայտնել է, թե իբր միջադեպը տեղի է ունեցել հիվանդին զսպելու համար։

«Իրենք ինձանից լավ պետք է տեղեկացված լինեն, որ զսպման միջոցները չեն կիրառվում հիվանդասենյակներում, 12 հիվանդի ներկայությամբ, նվաստացնելով և նսեմացնելով հիվանդին։ Դրա համար կա հատուկ սենյակ»,– նկատում է փաստաբանը։

Նա այս հարցով դիմել է առողջապահության նախարարություն, թեև այնքան էլ հույս չունի, թե կզբաղվեն խնդրով։

Արմինե Դավթյանին մտահոգում է նաև այն փաստը, որ չնայած դատաբժիշկը հենց նոյեմբերի 10-ին է ուղեգիր տրամադրել, բայց իրեն միայն այսօր են զանգել ու ասել, որ իր պաշտպանյալին տեղափոխում են պոլիկլինիկա հետազոտության համար։

«Հիմա ուզում եմ հասկանալ, ի՞նչ նպատակ են հետապնդում նրանք, սպասում են հետքերը վերանա՞, եթե ոչ` ապա ապացուցեք հակառակը»,– ասաց փաստաբանը։

Նա պահանջում է նաև, որ իրավապահ մարմինները տրամադրեն դեպքի վայրի տեսագրությունը։