Գործ ունենք հզոր «հանցագործների» հետ. գիտատեխնոլոգիական կենտրոնի աշխատակիցները Տիգրան Ավինյանին հրավիրում են ապօրինի կառուցապատման շինհրապարակ (տեսանյութ)

Օրգանական և դեղագործական քիմիայի գիտատեխնոլոգիական կենտրոնի աշխատակիցները պահանջում են, որ Երևանի քաղաքապետի ՔՊ-ի թեկնածու, քաղաքապետի տեղակալ Տիգրան Ավինյանը գնա Նուրբ օրգանական քիմիայի ինստիտուտի տարածք, որտեղ բարձրահարկ բնակելի համալիրի կառուցման շինթույլտվություն է տրվել:

Արդեն տևական ժամանակ է, ինչ կենտրոնի աշխատակիցները պայքարում են այս կառուցապատման դեմ: Ազատության պողոտայի սկզբնամասում գտնվող ՊՈԱԿ-ի նախկին տարածքում կառուցվելիք բարձրահարկ համալիրը, ըստ աշխատակիցնրերի, վտանգի տակ է դնելու կենտրոնի գոյությունը:

Մասնավորապես` անթույլատրելի են համարում քիմիական գիտատեխնոլոգիական գործունեությամբ զբաղվող կենտրոնի օտարված տարածքում՝ ջրավազանի տեղը բարձրահարկ բնակելի համալիրի կառուցումը` պնդելով, որ գիտատեխնոլոգիական կենտրոնը և բնակելի շենքը պարզապես անհամատեղելի են։ Քաղաքապետարանի մոտ բազմաթիվ բողոքի ակցիաներին քաղաքային իշխանություններն անհաղորդ են մնացել` թույլ տալով, որ վիճահարույց ու վտանգավոչ շինարարությունը շարունակվի:

Քիչ առաջ կենտրոնի աշխատակից Ռոբերտ Հակոբյանն ուղիղ եթեր էլ մտել` շինհրապարակից` առաջարկելով Տիգրան Ավինյանին, որն այս օրերին շրջում է մայրաքաղաքի տարբեր տարածքներում ու նկարվում, գնալ իրենց մոտ` նկարվելու :

Իսկ նույն կենտրոնի մեկ այլ աշխատակից` Արփինե Հարությունյանը նշել է. «Գործ ունենք հզոր «հանցագործների» հետ։Չնայած չակերտներում գրեցի, բայց սա իրոք բավականին մեծ հանցագործություն է Պետության և Հայաստանի գիտության հանդեպ։

Ինչպե՞ս, ո՞վ/ովքե՞ր են տալիս այս ապօրինությունների մտքերն ու թույլտվությունները»։