Երաշխավորում եմ, որ շատերի դիմակները կպատռվեն. «Հրապարակ»

«Հրապարակ» թերթը գրում է.

«Նոյեմբերի 23-ին Հակակոռուպցիոն դատարանում տեղի է ունենալու Բարձրագույն դատական խորհրդի նախկին նախագահ Ռուբեն Վարդազարյանին վերաբերող քրեական գործով հերթական դատական նիստը։ Հիշեցնենք, որ այդ գործով Վարդազարյանին մեղադրանք էր առաջադրվել այն բանի համար, որ նա, 2019թ. հուլիսի 19-ից զբաղեցնելով Բարձրագույն դատական խորհրդի նախագահի պաշտոնը, իրեն տրված լիազորությունների հետ չկապված գործողություններ կատարելով, պաշտոնեական դիրքը՝ պաշտոնից բխող հեղինակությունն օգտագործելով՝ ենթադրաբար միջամտել է Լոռու մարզի ընդհանուր իրավասության դատարանի արդեն նախկին դատավոր Անդրանիկ Սիմոնյանի կողմից արդարադատության իրականացմանը: Վարդազարյանի դեմ քրգործի հիմք էր դարձել հենց Անդրանիկ Սիմոնյանի ցուցմունքը։

Վերջինիս բախտն այդ ցուցմունքից հետո բացվեց, եւ նա նշանակվեց Քննչական կոմիտեի նախագահի տեղակալ, ապա այդ պաշտոնում 5 օր պաշտոնավարելուց հետո նշանակվեց արդեն ԱԱԾ փոխտնօրեն։ Այսինքն՝ նա ԱԱԾ բարձր պաշտոնին չէր համապատասխանում, քանի որ դատավորի աշխատանքը չի համարվում զինվորական ծառայություն, և չուներ բարձր զինվորական կոչում, իսկ ԱԱԾ փոխտնօրենի համար առնվազն պիտի գնդապետի զինվորական կոչում ունենար, և այդ ճանապարհը նրան արագընթաց կերպով անցկացրին, որ արագությամբ նշանակեն։ Հավանաբար՝ ցուցմունք-պաշտոնի դիմաց գործընթացում նաեւ ժամկետի խոստում կար։  

Մեզ հետ զրույցում Վարդազարյանն ասաց, որ դեռ գործի դատական քննությունը չի սկսվել, նախապատրաստական փուլն է։ Նրան հարցրինք՝ վարույթն իրականացնող մարմինը կարողացե՞լ է փաստերով հագեցնել մեղադրանքը, թե՞ միայն Անդրանիկ Սիմոնյանի ցուցմունքն է մեղադրանքի հիմքում։ «Գործի հիմքում միայն իր ցուցմունքն է, ու ինձ թվում էր՝ իր կատարած ձայնագրությունը, որը տվել է Անդրանիկ Սիմոնյանը, ու դեռ պարզ չէ, թե դա ինչ ձայնագրություն է»,- ասաց Վարդազարյանը։ Հարցրինք՝ օրինակա՞ն ճանապարհով կատարված ձայնագրություն է, այսինքն՝ կհամարվի՞ օրինական ապացույց։ «Ես չգիտեմ, այ, որ գաք դատարան, այդ հարցերի պատասխանը․․․, ես էլ չունեմ այդ հարցերի պատասխանը՝ օրինակա՞ն է, թե՞ օրինական չէ, թույլտվությունո՞վ է, թե՞ առանց թույլտվության է։ Այդ բոլոր հարցերի պատասխանը կտա դատաքննությունը»։ Այսինքն, նախաքննության ընթացքում այդ հարցերին անդրադարձ չի՞ եղել՝ հարցրինք ԲԴԽ նախկին նախագահին։ «Ոչ, նախաքննության ընթացքում քննիչն այդ հարցերին չի անդրադարձել, ես նյութերում նման հարց չեմ տեսել»։

Հետաքրքիր է, որ Ռուբեն Վարդազարյանի հրապարակած ձայնագրությունը, որում ԲԴԽ անդամ Գագիկ Ջհանգիրյանն իրեն ստիպում էր պաշտոնից հրաժարական տալ ու քրեական գործով էր սպառնում, իրավապահների կողմից անտեսվեց, եւ իրավական գործընթացներ չհետեւեցին, իսկ Վարդազարյանի պարագայում հենց նմանատիպ մի ձայնագրություն է դրված քրեական գործի հիմքում։ Մեզ հետ զրույցում Վարդազարյանը չհամաձայնեց պնդմանը, որ իրավական պրոցեսներ չեն հաջորդել իր հրապարակած ձայնագրությանը՝ Գագիկ Ջհանգիրյանի հետ․ «Եկեք այսպես ասենք՝ կարծես թե չհաջորդեցին, որովհետեւ մենք չգիտենք՝ հաջորդե՞լ են, թե՞ չէ։ Երբ մենք տեղեկատվություն չունենք, դա դեռ չի նշանակում, որ չի հաջորդում»։ Այսինքն՝ հույս ունեք, որ քրեական գո՞րծ կհարուցվի Ձեր հրապարակած ձայնագրության հիման վրա՝ հարցրինք Վարդազարյանին։ «Ես ընդամենն ասում եմ, որ ես տեղեկատվություն չունեմ, իսկ հույս ունեմ, թե չունեմ՝ դա արդեն շատ գլոբալ հարց է։ Այդ թեմայով մի քանի ժամանոց հարցազրույց կարելի է վերցնել, թե հույս ունե՞մ ես, թե՞ չէ, եւ ինչի վրա է հիմնված իմ՝ հույսի առկայությունը կամ բացակայությունը»։

ԲԴԽ նախկին նախագահից հետաքրքրվեցինք նաեւ՝ իսկ ի՞նչ հույսեր ունեք Ձեր դեմ հարուցված քրեական գործի դատաքննության հետ կապված՝ գործն ի՞նչ ճակատագիր կունենա։ «Չեմ կարող ասել, թե ինչ հանգրվանի կհասնի, բայց որ շատ դիմակներ կպատռվեն, եւ շատերի մոտ ավելի շատ հարց կառաջացնի այս գործը, քան թե պատասխան, դա երաշխավորում եմ»,- ասաց Վարդազարյանը»: