Բանակի հրամանատա՞րը պետք է գնա, տեխնիկայի վիճակը ստուգի, պետք է հատ-հատ խոդի տա, քշի՞․ Ջալալ Հարությունյանի փաստաբան

44-օրյա պատերազմի ժամանակ հայկական կողմն օպերացիաներից մեկի ընթացքում ունեցել է թշնամու զինտեխնիկայի գրավում։ Այս մասին լրագրողների հետ զրույցում ասաց Արցախի Պաշտպանության բանակի նախկին հրամանատար Ջալալ Հարությունյանի փաստաբան Արսեն Սարդարյանը՝ նշելով, որ այդ մասին ոչ ոք չի խոսում։

Նա պատմեց, որ օպերացիաներից մեկի ժամանակ էլ, ձախակողմյան հատվածում հայկական կողմը հասել է Ջաբրայիլ-Հորադիս մայրուղուն և սպասել ամրանալուն, որը տեղի չի ունեցել։ Փաստաբանը նշեց պատճառներից մեկը։

Նա պատմեց, որ հրամանատարներից մեկի վրա (ում անունը չնշեց՝ ելնելով գործի քննության գաղտնիությունից), առանցքային պատասխանատվություն է եղել տեխնիկան տեղ հասցնելու գործում, սակայն այդ տեխնիկան այդպես էլ չի հասել։

«Պատճառաբանվել է, թե տեխնիկան հանկարծակի խափանվել է․ այդ տեխնիկան չի խոցվել, չի վնասվել, բայց տեղ չի հասել։ Դրա պատճառով խիստ տուժել է պաշտպանությունը։ Սա ինչպե՞ս կարելի է կապել ընդհանուր բանակի գործողությունների հետ»,- ասաց փաստաբանը։

Նա պատմեց նաև, որ հետագա մարտերի ընթացքում, աջ թևի առաջխաղացումը կանգնել է՝ առանց հրամանի։ Ավելի ուշ պատճառաբանություն է եղել, թե տեխնիկան խափանվել է։ 

«Հիմա էստեղ պատճառաբանություններում գրում են, թե Ջալալ Հարությունյանը նախապես չի ստուգել զրահատեխնիկայի վիճակը։ Հարգելիներս, բանակի հրամանատա՞րը պետք է գնա տեխնիկայի վիճակը հատ-հատ ստուգի։ Պետք է խոդի տա քշի՞ հատ-հատ»,- ասաց Արսեն Սարդարյանը։

Նա վստահեցնում է, որ 99 տոկոսից բարձր վիճակում են եղել բոլոր տեխնիկաները՝ տվյալներ կան։

Փաստաբանն ընդգծում է նաև, որ տեխնիկայի մասով պատասխանատուներին այլ տեղում պետք է փնտրել։