Վարուժան Ավետիսյանի կյանքին վտանգ է սպառնում. Դավիթ Սանասարյան

Վարուժան Պարսամի Ավետիսյանի կյանքին վտանգ է սպառնում. ունենալով առողջական լուրջ խնդիրներ, գտնվում է անազատության մեջ։ Այս մասին ֆեյսբուքյան իր էջում գրել է ՊՎԾ նախկին պետ Դավիթ Սանասարյանը: 

«Միջնորդում եմ, որպեսզի Վարուժանին տեղափոխեն քաղաքացիական հոսպիտալ, որտեղ և պատշաճ հետազոտություն կանցնի։

ԱԺԲ-ն եթե ունի երաշխավորողների դիմում, ապա պատրաստ եմ ստորագրել։

Առողջություն Վարուժանին»,- գրել է Սանասարյանը: 

Նշենք, որ Արդարադատության նախարարությունն ավելի վաղ՝ նոյեմբերի 13-ին հաղորդագրություն էր տարածել, որում ասվում էր, որ Ավետիսյանը ենթարկվել է բուժզննության, նրա առողջական վիճակը գնահատվել է լավ, նա գանգատներ չի ներկայացել:

«Երեկ լրատվամիջոցներով տարածվել էր տեղեկության այն մասին, որ Վարուժան Ավետիսյանի առողջական վիճակը վերջին օրերին վատացել է:

Նույն օրը՝ 12.11.22թ-ի երեկոյան համայցի ժամանակ, հերթապահ բուժքրոջ կողմից կատարվել է Վարուժան Ավետիսյանի ընդունելություն, որի ժամանակ ազատազրկված անձը որևէ գանգատ չի ներկայացրել, օբյեկտիվ զննության արդյունքում հեմոդինամիկ տվյալները եղել են նորմայի սահմաններում. Զ/Ճ 130/85, պուլսը 82 զարկ/րոպե, սատուրացիան 96, ջերմաստիճանը 36,2։

13.11.22թ-ին կատարվել է ընդունելություն ստորաբաժանման ղեկավարի ժամանակավոր պաշտոնակատարի կողմից, որի արդյունքում ազատազրկված անձի առողջական վիճակը գնահատվել է լավ, վերջինիս կողմից գանգատ չի ներկայացվել, օբյեկտիվ զննության տվյալները' նորմայի սահմաններում։ Վ. Ավետիսյանի կողմից նշվել է, որ վերջին անգամ առողջական վիճակի հետ կապված գանգատ ունեցել է 2021թ.-ի ապրիլ ամսին»,- ասված էր հաղորդագրությունում։