Երբ զինծառայությունը դիտարկվում է որպես սովորական աշխատանք, ապա պրոֆեսիոնալ բանակ ստեղծելու որևէ շանս չկա․ Աբրահամյանը «Զինծառայողի ատեստավորման մասին» նախագիծը ռիսկային է համարում

«Պատիվ ունեմ» խմբակցության քարտուղար Տիգրան Աբրահամյանի համոզմամբ՝  ՀՀ զինված ուժերում ատեստավորման հետ կապված նախագիծն ունի բազմաթիվ ռիսկեր։ Այդ մասին պատգամավորն ասաց ԱԺ ճեպազրույցում։

Որպես ռիսկ, նա մատնանշեց այն, որ նախագծում, օրինակ, սահմանված չէ կառավարության այն որոշումը, որը կարգավորում է ատեստավորման գործընթաց, թե ինչ չափորոշիչների հիման վրա է և ինչ սկզբունքներով է իրականացվելու։ 

«Սա ինչո՞վ է կարևոր. այս գործընթացի ցանկացած խափանում Զինված ուժերում բերելու է շատ ավելի ծանր վիճակի, քան այսօր ունենք»,- ասաց նա։

Ինչ վերաբերում է նախագծով սահմանվող խրախուսման համակարգին, ապա Տիգրան Աբրահամյանը նկատում է, որ նախ պետք է բազային աշխատավարձը հասցնել համապատասխան մակարդակի, ու մարտական հերթապահության համար նախատեսված հավելավճարներն ունենան համապատասխան վիճակ։

«Այսինքն՝ չկան այնպիսի ցածր թվեր, որոնք այսօր կան»,- ասաց  պատգամավորը։

Խոսելով «Պաշտպան հայրենյաց» նախագծից, Աբրահամյանը նկատեց, որ նախ պետք է հասկանալ, թե իրականում որքանով է պետությունը տվյալ իրավիճակում թիկունք զինծառայողին։

«Շատ կարևոր է հասկանալ, թե ինչ միջավայր է ստեղծված Զինված ուժերի ներսում՝ սկսած բարոյահոգեբանական վիճակից, կարգապահական խնդիրներից, և այլն», - ընդգծեց Աբրահամյանը։

Չնայած նա այս նախագծի հետ կապված շատ խնդիրներ է տեսնում, սակայն ընդգծում է, որ որպես  պայմանագրային զինծառայությանն աջակցող ծրագիր, կողմ է քվեարկելու նախագծին։ 

«Գիտե՞ք՝ մեր խնդիրը որն է։ Քաղաքական իշխանությունը շարունակ խոսում է պրոֆեսիոնալ բանակ ստեղծելու մասին, դրան գնալու ճանապարհների մասին, բայց այդ մոտեցումը չկա։ Օրինակ, այդ հանձնաժողովում այս նախագիծը քննարկելիս ասվում էր, որ զինծառայողը երեկոյան ժամերին կարող է աշխատանքից տուն վերադառնալ։ Խնդիրը հենց այստեղից է սկսում։ Զինվորական ծառայությունը, առաքելությունը երբ դիտարկվում, ընդունվում է որպես սովորական աշխատանք, ապա դու պրոֆեսիոնալ բանակ ստեղծելու որևէ շանս չունես»,- նշեց պատգամավորը։