Պատգամավորը կանխատեսում է՝ գնաճ կլինի նաև հաջորդ տարի

Հայաստանում գյուղատնտեսության իրական ծավալները հետևողականորեն նվազում են ու սա է պատճառներից մեկը, որ առաջին անհրաժեշտության ապրանքների գնաճն էապես ավելի բարձր է, քան՝ միջին գնաճը։ Այս մասին ԱԺ ճեպազրույցում ասաց  «Հայաստան» խմբակցության պատգամավոր Թադևոս Ավետիսյանը։

«Սննդամթերքը գրեթե 1,5 անգամ ավելի շատ է թանկանում, քան՝ միջին գնաճը, որ կա Հայաստանում։ Մի կարևոր հանգամանք ևս՝ մենք գնում ենք աշխարհին հակառակ ճանապարհով, մեր երկրում 2018 թվականից հետո, այս պահի դրությամբ, պարենային ապրանքների ապահովվածության գործակիցը 65 տոկոսից նվազել է մինչև 47 տոկոս», -ասաց տնտեսագետը՝ հավելելով, որ 20 տոկոս նվազումը լուրջ խնդիր է։

Նրա դիտարկմամբ՝ ահագնացող գնաճի բոլոր գործոններն այս պահին կան։ Պատգամավորը կանխատեսում է՝ դրանք կլինեն նաև հաջորդ տարի։

«Այնպես որ, այն բյուջեն, որ բերել են այսօրվա իշխանությունները, դա սոցիալական իմաստով հետևյալի մասին է, որ ամեն հաջորդ օր, նաև հաջորդ տարի, մեր քաղաքացիները, խոսքը նախ և առաջ վերաբերում է աշխատող աղքատներին, միայնակ կենսաթոշակառուներին, ընդհանրապես աղքատ ընտանիքներին, ավելի վատ են ապրելու, որովհետև ամեն հաջորդ օր գները բարձրանում են, իսկ իրենց եկամուտները դրանց համապատասխան չեն բարձրանում»,- ասաց Թադևոս Ավետիսյանը։

Նրա գնահատմամբ՝ սրանք խնդիրներ են, որ իրավական տեսանկյունից հակասում են նաև Սահմանադրությանը, որտեղ կարգավորված են նաև երկրի ժողովրդի սոցիալ-տնտեսական վիճակի հետ կապված հարցերը։