Մեղավորներ փնտրելու փոխարեն` աշխատել է պետք. Վահան Բաբայան

«Երկու զեկույցներն էլ աննախադեպ են ձևակերպումներով ու տերմինաբանությամբ: Դրանք հակասում են խնդրի կարգավորման մոտեցումներին, խեղաթյուրում են միջազգային հանրության տեսակետները ԼՂ խնդրի վերաբերյալ: Բանաձևներն իրենց մեջ ներառում են ԵԽԽՎ կանոնադրության հիմնական սկզբունքների խախտում, քանի որ դրանք երկուսն էլ ներկայացված են միակողմանի, զեկուցողները չեն այցելել Լեռնային Ղարաբաղ»,-ասաց Եվրոպայի խորհրդի խորհրդարանական վեհաժողովի ԱԺ պատվիրակության անդամ, «Բարգավաճ Հայաստան» խմբակցության պատգամավոր Վահան Բաբայանը, նշելով, որ հայկական պատվիրակությունը Ստրասբուրգ կմեկնի հունվարի 23-ին:

Պատգամավորի տեղեկացմամբ` երկու հակահայկական բանաձևերի քննարկումը տեղի կունենա հունվարի 26-ին, իսկ մինչ այդ արվում է հնարավորինն ու անհնարինը՝ կանխելու դրանց ընդունումը:

Հիշեցնենք, որ խոսքը, մասնավորապես, բրիտանացի խորհրդարանական Ռոբերտ Ուոլթերի «Բռնության աճը Լեռնային Ղարաբաղում և Ադրբեջանի մյուս օկուպացված տարածքներում» և Բոսնիայի ու Հերցեգովինայի ներկայացուցիչ Միլիցա Մարկովիչի «Ադրբեջանի սահմանամերձ բնակավայրերի բնակիչները կանխամտածված կերպով զրկվում են ջրից» զեկույցների մասին է։ Երկուսն էլ քննարկվելու են հունվարի 26-ին ԵԽԽՎ-ում կայանալիք նիստին։

Լրագրողները անդրադարձան նաև տարածված այն լուրերին, թե պետք է փոխվի ԵԽԽՎ հայկական պատվիրակության ղեկավարությունը, ինչին ի պատասխան պատագամավորը նշեց. «Տեղեկություն չունեմ ղեկավարի փոփոխության հետ կապված, երկրորդ՝ մեղավորներ փնտրելու փոխարեն պետք է բոլորս լավ աշխատենք արդյունքի հասնելու համար: Որպես պատվիրակության անդամ՝ կարող եմ վստահեցնել, որ ղեկավարը հոյակապ իրականացնում է իր գործառույթները, ու չի եղել մի բան, որ իրենից կախված է եղել և նա չի արել»: