Բա գայիք քննարկմանը. Ալեն Սիմոնյանը հունից դուրս եկավ և անջատեց Գեղամ Մանուկյանի խոսափողը (տեսանյութ)

Ազգային ժողովը կառավարության կողմից ներկայացված «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին մասին օրենքի նախագիծն առաջին ընթերցմամբ ընդունեց։ Նախագիծն ընդունվեց 73 կողմ, 0 դեմ, 23 ձեռնպահ ձայների հարաբերակցությամբ։ «Ձեռնպահ» քվեարկեցին ընդդիմադիր «Հայաստան» խմբակցության պատգամավորները։

Վարման կարգով «Հայաստան» խմբակցության պատգամավոր Գեղամ Մանուկյանը խոսքի հնարավորություն ստացավ և ասաց. «Այս նախագծի հետ կապված. բնական է, որ անհնար է մերժել Զինված ուժերի բարեփոխումների, կամավորության սկզբունքով երկարատև ծառայության անցնելու ցանկացած նախաձեռնություն, դա խրախուսելի է և այս օրինագիծը միտված էր դրան։ Բայց պետք է արձանագրել, որ հիմնավորումներում նշված է, թե «Ես եմ» ծրագիրը տապալվել է, որը ներդրվել է 2017 թվականին, այն տապավել է 4 տարիների ընթացքում այս իշխանության օրոք»։

ԱԺ նախագահ Ալեն Սիմոնյանը հետաքրքրվեց՝ թե ի՞նչ կապ ունի սա վարման կարգի հետ։

«Օրենքի քննարկման ժամանակ գայիք»,- ասաց Սիմոնյանը։

Գեղամ Մանուկյանը նշեց, որ մեկնաբանությունն իրենց ձեռնպահ քվեարկելը հիմնավորելու համար էր։ Նա շարունակում էր իր խոսքը, սակայն Ալեն Սիմոնյանը պահանջեց անջատել ընդդիմադիր պատգամավորի խոսափողը։