Զինված ավազակային հարձակման փորձ՝ Երևանում

Դանակով զինված ավազակային հարձակման փորձ է տեղի ունեցել Երևանում։  Գլխարկով գլուխը փակած մի քաղաքացի դանակով զինված մտել է Ավան վարչական շրջանի Խուդյակով 220/5 հասցեում գործող «Յուքոմ»-ի սպասարկման գրասենյակ և ակնհայտ այնտեղից փորձել է հափշտակել թանկարժեք բջջային հեռախոսներ։

Ինչպես դեպքի վայրից հայտնում է Shamshyan.com-ը, ճիվաղին տեղում վնասազերծել է ՀՀ Արդարադատության նախարարության քրեակատարողաան ծառայության աշխատակիցը, ով այդ պահին անցնելիս է եղել նշված վայրով ու նկատել է, որ գրասենյակի ներսում աժիոտաժ է, ապա նա, վտանգելով իր կյանքը, մտել է ներս ու վնասազերծել հանցագործին։

Ահազանգով դեպքի վայր են ժամանել ոստիկանության Երևան քաղաքի վարչության պետ Սևան Քոչարյանը, վարչության պետի օպերատիվ գծով տեղակալ Խորեն Բարխոյանը, նույն վարչության քրեական հետախուզության բաժնի պետ Հովհաննես Արիստակեսյանը։ Ժամանել են նաև ոստիկանության Նոր Նորքի բաժնի պետ Իգոր Մեսրոպյանը և ոստիկանության Ավանի բաժանմունքի պետ Արտաշ Մուշեղյանը։ Ահազանգով ժամանել են նաև Հայաստանի քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնի խումբը՝ քննչական բաժնի պետ Հայրապետ Հայրապետյանի և պետի տեղակալ Ազատ Դանիելյանի գլխավորությամբ։

Մինչ դեպքի վայրում քննիչները տեղազննություն էին կատարում՝ ոստիկանության Ավանի բաժանմունքի պետի տեղակալ Արմեն Առուշանյանի գլխավորությամբ, օպերխումբը, որում ներգրավված են քրեական հետախուզության խմբի օպերլիազորներ, գրասենյակից մոտ 10 մետր հեռավորության վրա հայտնաբերվել է խոհանոցային դանակ, որը հանդիսանում էր հանցագործության գործիք։ Օպերատիվորեն ժամանել են նաև ՀՀ ոստիկանության պարեկային ծառայության Երևանի գնդի 1-ին գումարտակի 2-րդ վաշտի պարեկները՝ գումարտակի հրամանատար Արամ Դադոյանի գլխավորությամբ։ Տեղում տարածքը սահմանազատել և ուժեղացված ծառայություն են կատարում նույն վաշտի պարեկներ Գրիգոր Աբգարյանն ու Ռաֆիկ Վարդանյանը։ Դեպքի փաստով քննչական բաժնում նախաձեռնվել է քրեական վարույթ։

Շամշյանի տեղեկություններով՝ վնասազերծվածը Երևանի բնակիչ՝ 39-ամյա Սահակ Ս-ն է, ով տեղափոխվել է ոստիկանության Ավանի բաժանմունք, որտեղից էլ նրան ներկայացրել են Ավան և Նոր Նորք վարչական շրջանների քննչական բաժին։ Դեպքի վայր է ժամանել նաև ՀՀ ոստիկանության պարեկային ծառայության Երևանի գնդի հրամանատար Անդրանիկ Իսախանյանը։ Գ. Շամշյանի տեղեկություններով՝ զինված հանցագործին վնասազերծածն աշխատում է ՀՀ Արդարադատության նախարարության քրեակատարողական ծառայության կենտրոնական մարմնի անվտանգության ապահովման բաժնում՝ որպես գլխավոր մասնագետ, նա կոչումով արդարադատության ավագ լեյտենանտ Սարգիս Մկրտչյանն է։