Բանակցություններից ես գոհ չեմ, գոհ չէ Նիկոլ Փաշինյանը, գոհ չէ Ալիևը. Հովիկ Աղազարյան (տեսանյութ)

Ընդդիմությունը դեռ մինչև արտահերթ ընտրությունները Վազգեն Մանուկյանին ցանկանում էր բերել իշխանության և դրանից հետո նահանջեցին։ Այս մասին ԱԺ-ում լրագրողների հետ զրույցում ասաց ՔՊ-ական Հովիկ Աղազարյանը՝ անդրադառնալով ընդդիմության վերադարձին ԱԺ։

Նա նշում է, որ ընդդիմությունը պատրաստ է ցանկացած մեկին բերել, միայն թե դա չլինի Նիկոլ Փաշինյանը։ Մինչդեռ Փաշինյանն, օրինակ, Հովիկ Աղազարյանի համար Հայաստանում անառարկելի քաղաքական հեղինակություն ունեցող գործիչ ու լիդեր է։

«Ընդդիմությունը քաղաքական մանիպուլյացիա է անում, երբ ասում է, որ Նիկոլ Փաշինյանի փոխարեն թող մեկ ուրիշը լինի բանակցությունների համար»,- ասաց նա:

Հարցին, թե գո՞հ եք Փաշինյանի վարած բանակցություններից, Աղազարյանը պատասխանեց․ «Բանակցություններից ես գոհ չեմ, գոհ չէ Նիկոլ Փաշինյանը, գոհ չէ Ալիևը, Մակրոնը, Պուտինը, ոչ մեկն էլ գոհ չէ, բայց բանակցությունները պետք են»։

Ըստ Աղազարյանի՝ բանակցությունների ընթացքում Հայաստանը կարողացել է աշխարհին ցույց տալ, որ Հայաստան-Ադրբեջան հարաբերությունները պետք է տարանջատել Արցախ- Ադրբեջան հարաբերություններից, քանի որ Արցախի ժողովուրդն ինքնորոշվել է, և բոլորը  պարտավոր են հարգել որպես պետություն։