Ալիևի առաջ քրոնիկ գլուխը կախողները թող չխոսեն ընդդիմության գլուխ կախելուց․ մենք միշտ էլ մեր օրակարգն ենք ունեցել ԱԺ-ում․ Խամոյան (տեսանյութ)

ԱԺ «Հայաստան» խմբակցության պատգամավոր Ագնեսա Խամոյանը չի կարծում, թե իրենց ԱԺ վերադարձն արտառոց երևույթ է։ Ավելին՝ ԱԺ-ում լրագրողների հետ զրույցում նա նկատեց, որ ԱԺ-ից ամբողջությամբ չեն էլ հեռացել։ Իհարկե, որոշակի ծավալների փոփոխություն եղել է, քանի որ, նրա որակմամբ, փողոցում ակտիվ պայքարում էին։

Իսկ քանի որ այս պահին փողոցում ակտիվ չեն և դադար են վերցրել՝ եկել են ԱԺ։

Ինչ վերաբերում է օրակարգին, որով խոստացել էին վերադառնալ խորհրդարան, ապա պարզվում է՝ այդ օրակարգը միշտ էլ նույնն է եղել․ «Մենք միշտ մեր օրակարգով ենք, այն վերաբերում է Արցախին, Հայաստանին, մեր ժողովրդի անվտանգությանը»,- ասաց Խամոյանը՝ հավելելով, որ պարզապես փոխվել է մարտավարությունը։ 

Ինչ վերաբերում է իշխանական թևի պատգամավորների որակումներին, թե ընդդիմությունը գլուխները կախ հետ եկավ, ապա Ագնեսա Խամոյանը, իր իսկ որակմամբ, Ալիևի առաջ քրոնիկ գլուխ կախողներին առաջարկում է չխոսել ընդդիմության գլուխ կախելու մասին։