Մարտուն Գրիգորյանի մեդալի երկու երեսը

Ազգային ժողովի նախագահ Գալուստ Սահակյանը ԱԺ պատգամավոր Մարտուն Գրիգորյանին ծննդյան 35-ամյակի առթիվ պարգեւատրել էր ՀՀ Ազգային ժողովի նախագահի հուշամեդալով՝ հասարակական-քաղաքակական կյանքում ներդրած մեծ ավանդի եւ ծավալած գործունեության համար: Բացի այդ, մեծ թվով հանրապետականներ և ԲՀԿ-ականներ մասնակցել են Մարտուն Գրիգորյանի ծննդյան առիթով կազմակերպված «քեֆին»: Մինչ Գալուստ Սահակյանը Մարտուն Գրիգորյանին կպարգևատրեր, թե գյումրեցիների և թե քաղաքական շրջանակներում տևական ժամանակ է, որ խոսվում է, թե Գյումրու հաջորդ քաղաքապետը Մարտուն Գրիգորյանն է լինելու: Մարտուն Գրիգորյանը գյումրեցի այն պատգամավորն է, որ ԲՀԿ –ի համար դժվար օրերին լքեց ԲՀԿ-ի նավը: Այն ժամանակ կոալիցիայի հեռանկարը չէր երևում, քաղաքական դաշտում կոլապս էր:

Խոսակցությունները, թե Մարտունը Գյումրու քաղքապետ է լինելու կարծես ակտիվանում են Գալուստ Սահակյանի կողմից հուշամեդալ ստանալուց հետո: Այդ մեդալով Գալուստ Սահակյանը ոչ միայն շնորհավորեց Մարտուն Գրիգորյանին, այլ քաղաքական  «մեսիջ» ուղարկեց Գյումրու ապագա քաղաքապետի մասով:

ՀՀԿ-ն հասկացել է, որ Սամել Բալասանյանի վրա հույս դնել պետք չէ, Բալասանյանը ճամաբարափոխության առումով ավելի փորձառու է, բացի այդ չի կարողացել արդարացնել հանրապետականների հույսերը` տարբեր առիթներով գյումրեցիների ցասումը լռեցնելու համար: Newspress.am –ի հետ զրույցում հանրապետական գյումրեցի պատգամավոր Սուքիաս Ավետիսյանը նշեց, որ տեղյակ չէ Մարտուն Գրիգորյանի պարգևատրումից, տեղյակ էլ չէ`Գրիգորյանը Հանրապետականի համար Գյումրու քաղաքապետի պաշտոնում նախընտրելի թեկնածու է, թե՞ ոչ:

Սուքիաս Ավետիսյանը հրաժարվեց պատասխանել այն հարցին, թե գումրեցիների համար շրջանառվող թեկնածուներից, ով է ավելի նախընտրելի` նախկին քաղաքապետեր Վարդան Ղուկասյանը՞, գործող քաղաքապետ Սամվել Բալասանյանը՞, թե՞ Մարտուն Գրիգորյանը:

«Ես չգիտեմ, տեղյակ չեմ, չեմ կարող ասել», -ասաց նա:

Սուքիաս Ավետիսյանը նաև չպատասխանեց այն հարցին, թե Գյումրու համար ինչպիսի քաղաքապետ է պետք, ինչ փոփոխություններ պետք է կատարվեն: Ի դեպ գրեթե բոլոր հանրապետականները Գյումրու ընտրությունների վերաբերյալ խոսելիս դրսևորում էին զգուշավորություն, լրագրողներին հասկացնելով, թե այդ մասին կխոսեն միայն այն ժամանակ, երբ Հանրապետականը ուղիղ կհայտարարի` ո՞վ է իր թեկնածուն, ո՞ւմ է սատարում: Մեզ հետ զրույցում ևս մի շարք Հանրապետականներ Գյումրու ընրություններ վերաբերյալ հարցը լսելիս միանգամից անջատեցին խոսափողը: Միայն Շուշան Պետրոսյանն ասաց, որ Գյումրուն ուժեղ քաղաքապետ է պետք, կուտակված շատ խնդիրներ կան, դրանք պետք է հրատապ լուծել: Շուշան Պետրոսյանը նաև ասաց, որ տեղյակ չէ`  հանրապետականների համար ով է նախընտրելի թեկանծուն:

«Թեմային ծանոթ չեմ»,-եզրափակեց նա: