Որոշել էինք հունվարից աշխատավարձ բարձրացնել. չգիտեմ՝ ոնց ենք տեղավորվելու. դոտացիան կրճատել են, Գյումրիի քաղապետարանում մտահոգ են

Գյումրու ավագանին կձևավորի հանձնաժողով՝ ուսումնասիրելու համար քաղաքում Ամանորի միջոցառումների կազմակերպման և անցկացման համար նախատեսված ծախսերը: Ինչպես տեղեկացնում է «Արմենպրես»-ը, ավագանու հերթական նիստի ժամանակ առաջադրված նախագիծն Ամանորի ծախսերի մասով ավագանին չի ընդունել:

Ավագանու տարբեր խմբակցությունների ներկայացուցիչներ իրենց դեմ քվեարկությունը բացատրել են նրանով, որ տարիներ շարունակ այդ նպատակով հատկացվող գումարն անփոփոխ է, իսկ միջոցառումների բովանդակությունը՝ նույնը:

Ըստ նախագծի՝ Ամանորի միջոցառումների կազմակերպման և անցկացման համար նախատեսվում էր հատկացնել 10 միլիոն 150 հազար դրամ գումար, որից 3 մլն դրամը՝ ամանորյա պարկերի ձեռքբերման, 9 հարյուր հազար դրամը՝ ամանորյա տոնավաճառի և տոնական օրերի ընթացիկ միջոցառումների կազմակերպման, 6 հարյուր հազար դրամը՝ կազմակերպչական և հյուրասիրության ծախսերի, 850 հազար դրամը՝ լույսերի վառման միջոցառման համար ձայնային և լուսային տեխնիկայի վարձակալության և գործարկման, 4 մլն 800 հազար դրամը՝ կենտրոնական հրապարակի գլխավոր տոնածառի և դեկորների տեղադրման ու լուսավորման աշխատանքների համար:

«Աշխարհում ամեն ինչ փոխվում է, Գյումրիում Ամանորի համար նախատեսված պարկերը մնում են նույնը», - նշել է ավագանու անդամ Արման Բաղդասարյանը՝ հավելելով, որ, օրինակ, լույսերի վառման միջոցառման ձայնային և լուսային տեխնիկայի վարձակալության գումարի փոխարեն երեխաների պարկերը կարելի է ավելի նորմալ տրամադրել:

Եղել է առաջարկ բոլոր ուժերի ներկայացուցիչների ներգրավմամբ սեղմ ժամկետում ձևավորել հանձնաժողով՝ ուսումնասիրելու Ամանորի համար նախատեսված ծախսերը: Գյումրու քաղաքապետը մտահոգություն է հայտնել, որ ժամանակը կարճ է, և այդ պարագայում դժվար կլինի ժամանակի մեջ տեղավորվել:

Մեկ այլ մասնագիտական հանձնաժողով կազմելու որոշում էլ կայացվել է դոտացիայի կրճատման հարցով: Համայնքապետի խորհրդական Լենա Ջիլավյանը տեղեկացրել է, որ 2022 թվականին 40 մլն դրամով, 2023-ին՝ 208 մլն դրամով ՀՀ կառավարությունը կրճատել է համայնքին հատկացվող դոտացիան (Պետական դրամական հատկացում ձեռնարկություններին, հիմնարկություններին՝ վնասները ծածկելու կամ այլ նպատակների համար): Լենա Ջիլավյանը տեղեկացրել է, որ դոտացիայի նվազեցման պատճառն իրենց համար անհասկանալի է։ Համայնքի ղեկավար Վարդգես Սամսոնյանն ավագանուն տեղեկացրել է, որ արդեն նամակ են գրել Կառավարությանը՝ պարզելու, թե ինչով է Կառավարության այս քայլը պայմանավորված։ Լենա Ջիլավյանն ավագանու անդամներին առաջարկել է ուղերձ պատրաստել և ուղարկել ՀՀ կառավարություն։

«Դոտացիան համահարթեցման սկզբունքով են տրամադրում, իսկ մենք արդեն 2023 թվականի բյուջեի նախագիծն ավարտում ենք, և մեր դոտացիան կտրեցին։ Հիմա նորից պետք է բյուջե կազմվի, այդքան գումարի չափով նվազեցվեն ծախսերը, և սա այն դեպքում, երբ որոշում կայացրեցինք հունվարից աշխատավարձի բարձրացում անել։ Ես չգիտեմ՝ ոնց ենք տեղավորվելու։ Մեզ լուրջ քննարկում է պետք», - նշել է Լենա Ջիլավյանը:

Որոշվել է ավագանու նիստից հետո մասնագիտական խումբ ձևավորել, հարցն արդեն այդ հարթակում քննարկել: