Ադրբեջանը մտածում է, որ պետք է հարցն այնպես լուծել, որ Հայաստանը եկամուտ չստանա և մնա շրջափակման մեջ. Փաշինյան

Ճանապարհների թեման քննարկելու ժամանակ Ադրբեջանն ասել է, որ կարծում է, որ Ադրբեջանի քաղաքացիները ՀՀ ճանապարհներով անցնելիս հնարավոր է մտավախություններ ունենան Հայաստանի սահմանային և մաքսային ծառայողների հետ անձնական կոնտակտ ունենալու հետ կապված: Այս մասին Հանրային հեռուստատեսությանը տված հարցազրույցում նշեց Նիկոլ Փաշինյանը: Նա անդրադարձավ երեկվա իր հայտարարությանը, թե Հայաստանը պատրաստվում է հաղորդակցության ուղիների բացման թեմայով պահեստային առաջարկ ներկայացնել:

«Մենք մեր առաջարկը փոխանցել էինք 2021-ի դեկտեմբերին, հիմա դրա պարզեցված տարբերակն են պատրաստվում ներկայացնել որպես առաջարկ: Եթե մենք գնում ենք տարածաշրջանում խաղաղություն հաստատելու օրակարգը սպասարկելու ճանապարհով, ասել, որ հայերն ու ադրբեջանցիները պետք է իրար հետ չշփվեն, այդքան էլ ճիշտ չէ: Պետք է վերադառնալ ամենապարզ տարբերակին, որ Ադրբեջանի սահմանին հսկողություն իրականացնում են Ադրբեջանի ծառայողները, ՀՀ սահմանին՝ Հայաստանի ծառայողները:

Ես առաջարկել էի, որ եթե հարցը չի կարգավորվում, եկեք օպերատորների պատվիրակենք: Մեր կողմից օպերատորը կարող են լինել ռուսները: Եթե դա էլ չի ընդունվում, ապա սա է մեր առաջարկը, այսինքն վերադառնանք առաջին տարբերակին: Մենք կարող ենք նաև միջնորդել միջազգային գործընկերներին, որպեսզի նրանք այդ անցակետերում աշխատող մաքսային և սահմանային մեր ծառայողների համար կազմակերպեն դասընթացներ: Էլ չեմ ասում, որ 21-րդ դարում շատ բան կարելի է անել էլեկտրոնային տարբերակով: Եթե Ադրբեջանի համար սա իսկապես հաղորդակցության հարց է, ոչ թե էսկալացիայի առիթ գտնելու, ապա հարցը գործնականում լուծված է»,-ասաց նա:

Նրա խոսքով՝  Հայաստանը կողմ է բոլոր երթուղիներին. «Մենք ասում ենք՝ եկեք արձանագրենք, որ իրավական կարգավորումների մասով մենք ձեռք ենք բերել պայմանավորվածություն, երթուղիների մասով մենք որևէ խնդիր չունենք: Ես որևէ երթուղու հետ խնդիր չունեմ, բացառությամբ այն տրամաբանության, թե որքանով է դա տեխնիկապես իրագործելի: Ոչ ոք մեզնից ավելի շահագրգիռ չի կարող լինել, որ դա լինի լավագույն, ամենահարմար ու կարճ երթուղին, որը 12 ամիս հասանելի ու անցանելի կլինի: Մենք երբեք չենք ասել, որ կա երթուղի, որին երբեք չենք համաձայնի: Ի վերջո, այդ ճանապարհը ՀՀ հաշվին է կառուցվելու, և եթե այդ ճանապարհով անցուդարձ չլինի, եկամուտ չբերի, կստացվի, որ մսխեցինք այդ գումարը: Հայաստանը շահագրգռված է, որ բեռնափոխադրումները և եկաթուղով, և ավտոճանապարհով լինեն հնարավորինս շատ, որ շատ եկամուտներ բերեն Հայաստանին: Գուցե խնդիրն այն է, որ Ադրբեջանը չի ուզում, որ Հայաստանը եկամուտներ ստանա: Գուցե Ադրբեջանը մտածում է, որ պետք է հարցն այնպես լուծել, որ Հայաստանը մնա շրջափակման մեջ»: