Սյունիքում BMW-ի վարորդը վրաերթի է ենթարկել հետիոտնին և փախուստի դիմել․ 59-ամյա տղամարդը մահացել է (լուսանկարներ)

Սյունիքի մարզում, այսօր՝ նոյեմբերի 11-ին, մահվան ելքով վրաերթ և փախուստի դեպք է տեղի ունեցել. ժամը 07։00-ի սահմաններում անհայտ մակնիշի և համարանիշի ավտոմեքենայի վարորդը Երևան-Մեղրի ավտոճանապարհի 198 կմ հատվածում վրաերթի է ենթարկել Վայոց Ձորի մարզի բնակիչ 59-ամյա Հայկ Խաչատրյանին։

Shamshyan.com-ի հաղորդմամբ, վարորդը վրաերթի ենթարկվածին թողնելով անօգնական, դեպքի վայրից դիմել է փախուստի, իսկ Հ․ Խաչատրյանը տեղում մահացել է։

Ոստիկանները պարզել են, որ մահացածը նշված հատվածում եղել է իրեն պատկանող Opel մակնիշի ավտոմեքենայով,որը տեխնիկական խնդիրներ է ունեցել: Վարորդը կանգնել է, որպեսզի խոտանը վերացնի։ Այդ ժամանակ անհայտ մակնիշի և համարանիշի ավտոմեքենայի վարորդը վրաերթի է ենթարկել ու դիմել փախուստի։

Իրավապահները վրաերթի վայրից 61 կմ հեռավորության վրա՝ արդեն Վայոց Ձորում` Վայքի զորամասի հարևանությամբ, հայտնաբերել են վրաերթ կատարած BMW մակնիշի ավտոմեքենան։ Այն տեղափոխվել է հատուկ պահպանվող տարածք։

Պարզվել է, որ վրաերթի ենթարկելու մեջ կասկածվողը Երևանի բնակիչ 47-ամյա Արման Հ․-ն է, որը խոստովանել է տեղի ունեցածը: Նա տեղում ենթարկվել է սթափության փորցաքննության, եղել է սթափ։