Ուրախ եմ, որ կարողացա այս մեդալը նվաճել և բերել մեր հայրենիք. Արթուր Դավթյան

Հայաստանի մարմնամարզության ֆեդերացիայի նախագահ Գագիկ Վանոյանը վստահ է՝ 2-3 տարվա ընթացքում կունենան միջազգային բոլոր ստանդարտներին համապատասխան սպորտային մարմնամարզության դահլիճ:

«Օդում կախված հարց չկա: Մարզադահլիճը կլինի, ասում եմ որպես ֆեդերացիայի նախագահ», - ասուլիսի ժամանակ վստահեցրեց Վանոյանը։

Նա նշեց, որ վերջին տարիներին մեր մարմնամարզությունը լավ արդյունքներ է գրանցում:

«Այդ ամենն ի պատիվ մեր մարզիչների` Հակոբ Սերոբյանի գլխավորությամբ, ինչպես նաև մեր տղաների, որոնք ջանք ու եռանդ չեն խնայում: Մենք կարողացանք ամբողջ աշխարհին ցույց տալ, որ աշխատասիրության, նվիրվածության շնորհիվ հնարավոր է ունենալ այսպիսի փառահեղ հաղթանակներ»,- նշեց Գագիկ Վանոյանը:

Անկախ Հայաստանի պամության Աշխարհի առաջին չեմպիոն, մարմնամարզիկ Արթուր Դավթյանն էլ նկատեց, որ իրենք պետք է ամեն ինչ անեն, որ միշտ բարձր պահեն Հայաստանի պատիվը։

«Շատ ուրախ եմ, որ կարողացա այս մեդալը նվաճել և բերել մեր հայրենիք: Ուզում եմ շնորհակալություն հայտնել մեր մարզիչներին, ֆեդերացիայի նախագահին, ընկերներիս, որոնք փոքրիկ լումա ունեն այս հաջողությունում: Հաջորդ տարին առավել կարևոր է, քանի որ վարկանիշային է Օլիմպիական խաղերի համար»,- ասաց Արթուր Դավթյանը՝ հավելելով, որ աշխարհի առաջնություններում ոչ մի մեդալ չունենալով միանգամից ոսկե մեդալ նվաճեց, հիմա ձգտելու է Օլիմպիական խաղերի ոսկե մեդալը նվաճել: