Հայաստանում շինարարության ծավալը սեպտեմբերին աճել է 14․6 տոկոսով

2022 թվականի սեպտեմբերին Հայաստանի Հանրապետությունում իրականացված շինարարության ծավալը 57 միլիարդ 121 միլիոն դրամ է. աճը նախորդ տարվա նույն ժամանակաշրջանի համեմատ կազմում է14․6%։ Այս մասին տեղեկանում ենք Վիճակագրական կոմիտեի հրապարակած ցուցանիշներից։

Շինարարության աճը նախորդ տարվա օգոստոսի նկատմամբ 8․8% է։ Այս տարվա հունվարից սեպտեմբեր 300 միլիարդ 215 միլիոն դրամի շինարարություն է իրականացվել․ աճը նախորդ տարվա նույն ժամանակաշրջանի համեմատ 14․3% է։

Սեպտեմբերին իրականացված ընդհանուր շինարարության 35․1%-ը կամ 20 միլիարդ 46 միլիոնն իրականացվել է պետական բյուջեի միջոցների հաշվին, համայքների հաշվին իրականացվել է ընդհանուր շինարարության 5․6%-ը կամ 3 միլիարդ 196 միլիոն դրամ։

Մարդասիրական օգնության միջոցների հաշվին իրականացվել է 0․8%-ը (430.1 միլիոն դրամ), բնակչության միջոցների հաշվին՝ 18․1%-ը (10 միլիարդ 366 միլիոն դրամ), իսկ իրականացված շինարարության գերակշիռ մասն ապահովվել է շինարարական կազմակերպությունների միջոցով՝ 40․4% կամ 23 միլիարդ 81 միլիոն դրամ։