«Ինչպես ասում է Չերչիլը, ամեն հաչող շան հետևից որ քար նետես, տեղ չես հասնի». Արփի Դավոյանը՝ իր վերաբերյալ հրապարակումների մասին

«Մամուլը գրում է այնպիսի բաներ, ինչպիսի պատվերներ ստանում է, տարիներ շարունակ հետևում ենք, թե այդ մամուլն ինչեր է գրում»։ Այս մասին այսօր Ազգային ժողովում լրագրողների հետ ճեպազրույցում ասաց ՔՊ-ական պատգամավոր Արփի Դավոյանը՝ պատասխանելով հարցին, թե ինչու են մամուլում իր մասին հրապարակումներ արվում, որտեղ մեղադրում են նրան ՔՊ վարչության ընտրությունները կեղծելու մեջ։

Արփի Դավոյանը նշեց, որ հրապարակում անողների հետ կհանդիպի իրավական հարթակում։

«Ինչպես ասում էր Ուինսթոն Չերչիլը, ամեն հաչող շան հետևից, որ քար նետես, տեղ չես հասնի։ Ընդամենն այդքան բան կասեմ»,- ասաց Դավոյանը։

Ինչպես մյուս ՔՊ-ականները, այնպես էլ Դավոյանը, նկատում է, որ թերություն է եղել ու վերահաշվարկ է եղել, ինչը նորմալ է։

«Նույն բանի մասին տարբեր ձևերով սկսում են խոսել, քննարկել, պետք է հասկանալ՝ ովքեր են այդ մարդիկ և ում էր ձեռնտու այդ մասին խոսել։ Եղել է վերահաշվարկ, որը ժողովրդավարության ցուցիչ է, այլ բան չունեմ ավելացնելու»,- ասաց նա։