Ձեր տրամաբանությամբ պարոն Ավինյանը զանգում է ինձ, ասում՝ այս որոշումն այսպե՞ս պետք է կայացնել, ես էլ ասում եմ՝ լավ, եղա՞վ․ Հրաչյա Սարգսյան

Որոշում ունենք, որ քաղաքապետի թեկնածուն պարոն Ավինյանն է լինելու։ Այդ որոշմամբ շարժվում ենք առաջ, ոչ մի խնդիր չկա։ Ցանկացած դեպքում էստաֆետը միշտ պետք է փոխանցվի այլ անձի։ Այսպես է մեկնաբանում Երևանի քաղաքապետ Հրաչյա Սարգսյանը Տիգրան Ավինյանի առաջադրումը Երևանի քաղաքապետի պաշտոնում։

Նա չի կարծում, որ քաղաքապետի պաշտոնին հրաժեշտ տալուց հետո կմնա քաղաքապետարանում, բայց ասում է, որ չի որոշել, թե ինչով է զբաղվելու հետո։

Հարցին, թե արդյոք կաշկանդված չէ՞, որ հիմա արդեն Տիգրան Ավինյանն է բոլոր որոշումները կայացնում, նախընտրական քարոզարշավ է իրականացնում, հանդիպում է քաղաքացիների հետ, Հրաչյա Սարգսյանը պատասխանեց. «Ձեր տրամաբանությամբ ո՞նց է՝ պարոն Ավինյանը զանգում է, ինձ ասում է՝ այս որոշումն այսպես պետք է կայացնել, ես էլ ասում եմ՝ լավ, եղավ, ստորագրո՞ւմ եմ»,- ասաց նա։

Հրաչյա Սարգսյանը վստահեցնում է, որ բոլոր որոշումները կայացվում են իր կողմից։

«Իհարկե, տարբեր հարցերի շրջանակներում բոլոր տեղակալների, վարչության պետերի հետ քննարկումներ են լինում։ Որոշ դեպքերում ես եմ ճիշտ լինում, կամ սխալ եմ լինում, համատեղ որոշում ենք կայացնում, շարժվում առաջ։ Վերջնական արդյունքը պետք է գնահատվի աշխատանքով, որն իրականացվում է»,- ասաց նա։