Տպավորություն է, որ Բաքուն ամեն քայլի գնալու է, որպեսզի դրդի ռուսական կողմին թույլ չտալ Վարդանյանին մնալ Արցախում. Տաթևիկ Հայրապետյան (տեսանյութ)

ԵԽԽՎ–ում Հայաստանի պատվիրակության նախկին անդամ, ադրբեջանագետ Տաթևիկ Հայրապետյանի տելեգրամյան ալիքում գրել է.

Ադրբեջանական AZ.TV պետական հեռուստաընկերության մեկ ռեպորտաժի սկզբում անդրադառնում են Փաշինյանի դերին և նշում, թե «նա կատարում է այլ երկրների պատվերները»:

«Հենց դրա համար է, որ Ալիևը իր ուղերձները ոչ թե Հայաստանին է հղում, այլ տարածաշրջանային երկրներին, ավելի ստույգ՝ Ռուսաստանին և Իրանին, ինչպես նաև Եվրոպային: Դադարեցրեք խաղերը և մի օգտագործեք Փաշինյանին: Կատարեք ձեր պարտավորությունները»: Այնուհետև անցնում են Ռուբեն Վարդանյանի թեմային, որի մասին ադրբեջանական քարոզչամեքենան բազմաթիվ հրապարակումներ է արել: Հաղորդավարը նշում է. «Ռուբեն Վարդանյանի այցը ի՞նչ նպատակ ուներ, հարգելի ռուս գործընկերներ: Նախագահ Պուտինն ասել է, որ Վարդանյանի տեղափոխման վերաբերյալ տեղեկություն չունի: Անկասկած, մենք ձեզ չենք հավատում: Վարդանյանի համար նման պայմաններ Ռուսաստանն է ստեղծել: Անկասկած, Ադրբեջանի նախագահը Սոչիում Պուտինի հետ հանդիպման ժամանակ խիստ անհամաձայնություն է հայտնել Վարդանյանի տեղափոխման հետ կապված, բացատրություններ է պահանջել:

Այս ի՞նչ խաղեր են»: Հետո խոսվում է նրա մասին, որ այս ամենը սկսվեց, երբ Ալիևը հայտարարեց, որ որևէ կարգավիճակի մասին խոսք լինել այլևս չի կարող և որ Մոսկվան փորձում է դա փոխել: Վերջում էլ նշում է, թե իբրև Մոսկվան այս ամենն արել է, որովհետև Արցախի հայերը արդեն համաձայնվել են ապրել Ադրբեջանի կազմում, իսկ եթե նրանք ստանան ադրբեջանական անձնագրեր, ապա ռուս խաղաղապահները պետք է դուրս գան:

Հ.Գ. Ինձ մոտ տպավորություն է, որ Բաքուն ամեն քայլի գնալու է, որպեսզի դրդի ռուսական կողմին թույլ չտալ Վարդանյանին մնալ Արցախում: Այս հիստերիան ցույց է տալիս, որ Բաքուն չունի վերահսկողություն, ինչպես փորձում է ամեն կերպ ցույց տալ և իրավիճակը փոխելու համար կարող է գնալ նոր հարձակման: