Պերմյակովի գործով հայկական կողմը գոլի հնարավորություն չունի, դարպասը գրավված է

Ավետիսյանների գործով դատավորը այսօր մերժեց նիստերը Շիրակի մարզի ընդհանուր իրավասության դատարանում անցկացնելու Ավետիսյանների իրավահաջորդների ներկայացուցիչների կողմից ներկայացված միջնորդությունը, դատավորին ինքնաբացարկ ներկայացնելու միջնորդությունը ևս մերժվեց: Փոխարենը Պերմյակովի պաշտպանի` Պերմյակովի ձեռքերից ձեռնաշղթան հանելու միջնորդությունը դատավոր Հարություն Մովսեսյանը բավարարեց: Ավելին, դատավորը Պերմյակովին հարցը ռուսերեն է տվել, թե արդյոք դեմ չէ, եթե դատավարությունը անցկացվի Շիրակի մարզի ընդհանուր իրավասության դատարանում: Պերմյակովն էլ պատասխենց` իրեն ռուսական ռազմաբազայի տարածքում ապահով է զգում:

newspress.am-ի հետ զրույցում փաստաբանների պալատի անդամ, փաստաբան Նորայր Նորիկյանը նշեց, որ դատարանի վարքագիծը կանխատեսելի էր: Այդ մասին է խոսում նաև այն, որ նիստերը ապօրինի կերպով ռուսական ռազմաբազայում են անցկացվում: Փաստաբանը շեշտեց, որ Պերմյակովի գործի շրջանակում հայտնվել ենք տխուր հանդիսատեսի կարգավիճակում. «կրկին ասեմ` քրեական գործի ոդիսականն ավելի շատ որոշվեց քաղաքական համաձայնությունների տիրույթում, ինչը նշանակում է, որ իրավաբանությունը կամ արդարադատության իրականացման բուն գործընթացը, եթե չի կրել և չի կրում ձևական բնույթ, առերևույթ գոնե ընթանում է բարձր մակարդակի պայմանավորվածությունների արդյունքում»:

Անդրադառնալով այն հանգամանքին, որ այսօր դատավորը Պերմյակովին հարցը ռուսերեն լեզվով է տվել, ասաց, որ նույնիսկ առաջին կուրսի ուսանողը գիտի, որ մեր դատավարության լեզուն հայրենն է:

Ըստ նրա՝ տուժողների իրավահաջորդների ներկայցուցիչները ճիշտ մարտավարություն էին ընտրել միջնորդություն ներկայացնելով դատավորի ինքնաբացարկի համար, եթե դատավորը փոխվեր, մյուս դատավորը քիչ թե շատ դասեր կքաղեր: Նորայր Նորիկյանը նաև ընդգծեց, որ Պերմյակովի գործի մասին խոսելիս միշտ ասում է, որ մենք թույլ տվեցինք ռուսական կողմին մեր դաշտում պաշտպանվել և հարձակվել, գրավել մեր դարպասը, զրկել մեզ պաշտպանությունից և հակախաղի որևէ հնարավորությունից: