«Դուք ունենք 36.000 դրամ, ի՞նչ կարող եք գնել դրանով և քանի՞ օր այն կբավականացնի»․ լրագրողը՝ նախարարին (տեսանյութ)

Միշտ ասում են՝ եկեք պատգամավորների աշխատավարձը տանք թոշակառուներին։ Եկեք տանք, տեսնենք՝ քանի լումայով կբարձրանա յուրաքանչյուրի թոշակը։ Այս մասին լրագրողների հետ զրույցում ասաց ՀՀ Աշխատանքի և սոցիալական հարցերի նախարար Նարեկ Մկրտչյանը՝ անդրադառնալով ցածր կենսաթոշակների խնդրին։

«Եթե դա կլուծի երկրի խնդիրը՝ ես պատրաստ եմ»,- ասաց Սոցապնախարարը։ 

Ըստ նրա՝ գնաճային ֆոնը զուտ հայկական ֆենոմեն չէ և չի կարելի ասել, որ թոշակների քիչ չափով բարձրացումը նման գնաճային ֆոնին՝ չի կարող հարց լուծել։

«Մենք քարանձավում չենք ապրում, ամբողջ աշխարհում նույն գնաճն է, ու դա անդրադառնում է նաև Հայաստանի վրա»,- ասաց նախարարը։

Նա վստահեցնում է, որ եթե այդ թոշակների բարձրացումները չլինեին, ապա 55%-ից ավել բարձր աղքատություն կգրանցվեր։

Լրագրողի դիտարկմանը, թե այդ գումարը գնաճին համաչափ ավելացում չէ, ու կառավարությունն իր դեպքում ավելի շռայլ է, քան թոշակառուի ու աղքատի, Մկրտչյանն ասաց․ «Պաշտոնյան էլ պետք է վարձատրվի, որ կարողանա այդ խնդիրներն իրականացնել»։

Նա չգիտի մի դեպք, երբ պաշտոնյան զուգահեռ զբաղվի նաև որևէ բիզնեսով․ «Եթե լինի՝ իրավապահները կզբաղվեն»,- ասաց նա։

Լրագրողները հարց ուղղեցին․ «Խանո՞ւթ գնում եք», ինչին դրական պատասխան լսելով՝ շարունակեցին հարցը․ «Դուք ունեք 36.000 դրամ, ի՞նչ կարող եք գնել 36.000 դրամով և քանի օր»։ Այս հարցին Նարեկ Մկրտչյանը չկարողացավ պատասխանել։ Լրագրողներն իրենք շտապեցին «օգնել»՝ նշելով, որ ամեն խանութ մտնելիս նա 36 000-ից ավելի շատ է ծախսում։