Հոսանքի սուբսիդավորումը կառավարության որոշմամբ կա, իսկ փաստացի` չկա

Դեկտեմբեր ամսվա էլեկտրաէներգիայի սպառումը բնակիչներին շրջանում խառնաշփոթ է առաջացրել, գումարի չափը անհավանական մեծ է: Չնայած կառավարությունը հայատարարում է սուբսիդավորման մասին և թվեր է ներկայացնում, սակայն սպառողների համար այդ փոխհատուցումը զգալի չէ:

Տնտեսագետ Արտակ Մանուկյանը newspress.am-ի հետ զրույցում անդրադառնալով կառավարության կողմից էլեկտրաէներգիայի սուբսիդավորմանը, նկատեց, որ կառավարության որոշմամբ հոսանքի սուբսիդավորում կա, իսկ փաստացի` չկա:

Նրա խոսքով` օգոստոս եւ սեպտեմբեր ամիսներին քիչ էներգիա է սպառվում և էներգիայի դիմաց վճարվող գումարի տարբերությունը շատ չնչին է, իսկ ձմռան ամիսներին արդեն այդ տարբերությունը զգալի է: Հաշվի առնելով այս ամենը և այն, որ կառավարությունը սուբսիդավորում է այն դեպքում, երբ սպառվում է 250 կվտ էներգիա, իսկ արդեն 251 կվտ-ի դեպքում սպառողն ամբողջությամբ զրկվում է սուբսիդավորումից` տնտեսագետն իրատեսական չի համարում կառավարության այն հայտարարությունն, ըստ որի` դեկտեմբերին բնակիչ-սպառողների շուրջ 60 տոկոսը օգտվել է սուբսիդավորման ծրագրից:

«Ես չգիտեմ, թե այդ թիվը որտեղից են վերցրել, դա ռիսկային է, հատկապես, երբ խոսքը վերաբերում է դեկտեմբեր ամսվան: Գիտե’ք, նոր տարվա նախաշեմ է եղել, և մարդիկ բավականին էլեկտրաէներգիա են սպառել: Այնպես, որ այդ թիվն իրականությանը չի համապատասխանում: Ես կասեի` դա նույնիսկ գերագնահատված է»,- ասաց տնտեսագետը` հավելելով, որ այս ամիսներին սուբսիդիան կընթանա նվազողական սցենարով և աստիճանաբար կձգտի զրոյի:

Հիշեցնենք, որ ժամանկին տնտեսագետը սուբսիդավորման հետ կապված այլ, ավելի օպտիմալ սակագների առաջարկով է հանդես եկել, սակայն, ինչպես Արտակ Մանուկյանն է նկատում, իր առաջարկը կառավարությունում քննարկման չեն դրել:

«Ամսական մինչեւ 250 կվտ սպառողների 1 տարվա փոխհատուցումը 3 հազար կիլովատ է: Լավ կլիներ, եթե սպառողին ոչ թե ամիսը 250 կիլովատի հնարավորություն տրվեր, այլ որ սպառողը տարվա կտրվածքով 3000 կիլովատի համար վճարեր 42 դրամ սակագնով: Եթե մարդը ձմռանը 250 կիլովատ է սպառելու, ամռանը՝ 200, ապա այս տարբերությունն իրար կփոխհատուցի… Բայց կառավարությունը քննարկման չդրեց այս առաջարկությունը և արեց այն, ինչ այսօր կա»,- newspress.am-ի հետ զրույցում ընդգծեց  տնտեսագետը:

Ինչ վերաբերում է սպառողների շրջանում առաջացած այն դժգոհություններին, թե հաշվիչի ցուցմունքերը չեն համապատասխանում իրականությանն, ապա տնտեսագետը բացատրում է. «Հնարավոր չէ, որ ցուցմունքները սխալ լինեն, պարզապես դա սակագնի 16 տոկոս աճն է, որ արդեն իրեն զգացնել է տալիս: Այսինքն ամեն կիլովատի դիմաց 7 դրամ ավել են վճարում»:

Հիշեցնենք, որ էլեկտրաէներգիայի սակագնի բարձրացման հարցը դրվեց օգոստոսից, կառավարությունն էլ հանդես եկավ սուբսիդավորման առաջարկով: