Զարմանում եմ, թե ինչո՞ւ է Փաշինյանը ադրբեջանական թեզի փաստաբանը դարձել, ի՞նչ ունի ինքը դրանից․ Արթուր Խաչատրյան

Նիկոլ Փաշինյանը Հայաստանի միակ ղեկավարն է, որը ստորագրում է փաստաթղթերի տակ, որտեղ նշված չէ, որ Արցախյան հակամարտությունը պետք է կարգավորվի իրավահավասարության և ազատ ինքնորոշման սկզբունքի հիման վրա։ Այս մասին այսօր՝ նոյեմբերի 1-ին, լրագրողների հետ զրույցի ընթացքում ասաց «Հայաստան» խմբակցության պատգամավոր Արթուր Խաչատրյանը՝ նշելով, որ նախկին բոլոր ղեկավարները հստակ ֆիքսել են, որ հակամարտությունը պետք է կարգավորվի Հելսինկյան եզրափակիչ ակտի երեք հիմնարար սկզբունքների հիման վրա։

«Ազգերի իրավահավասարություն, ազատ ինքնորոշում, ուժի կիրառման սպառալիքից հրաժարում և տարածքային ամբողջականություն։ Կա նաև ՄԱԿ-ի միջազգային արդարադատության դատարանի խորհրատվական կարծիքը Կոսովոյի վերաբերյալ, որտեղ հստակ հայտարարում են, որ միջազգային իրավունքը երբեք չի արգելում անկախության միակողմանի հռչակումը»,- թվարկեց պատգամավորը։

Այս ենթատեքստում, Խաչատրյանը նկատեց, որ Փաշինյանն ադրբեջանական թեզի փաստաբանն է դարձել, քանի որ, ըստ վերոհիշյալ միջազգային իրավունքի, տարածքային ամբողջականությունը երկու կայացած պետությունների խնդիր է:

«Այսինքն՝ ադրբեջանական թեզը, թե Արցախը չի կարող միակողմանիորեն անկախություն հռչակել, կործանվել է, և ես հիմա զարմանում եմ, թե ինչո՞ւ է Փաշինյանն ադրբեջանական թեզի փաստաբանը դարձել, ի՞նչ ունի ինքը դրանից: Հավանաբար, այդ ծառայություն գինն իր իշխանությունն է»,- ասաց Արթուր Խաչատրյանը։