Հոգնել ենք ստատուսով պայքարողներից, բոլորը թող գան, ուրախ կլինենք տեսնել հարթակում. Սաղաթելյան

Բոլորին հրավիրում ենք՝ Արման Թաթոյանին, Ավետիք Չալաբյանին․․․ ում գիտեք, բոլորին կոչ ենք անում, հրապարակային դիմում ենք գալ համախմբվել՝ Արցախի ինքնիշխանության, Հայաստանի պետական ամբողջականության պահպանման խնդրի շուրջ։

Այս մասին ասաց ԱԺ ընդդիմադիր պատգամավոր, «Դիմադրություն» շարժման համակարգող Իշխան Սաղաթելյանը՝ արձագանքելով լրագրողի հարցին, թե պատրա՞ստ է  ընդդիմությունը հարթակը տրամադրել քաղաքական ակտիվ գործիչներին։

«Ով կարող է օգնել այս պայքարում հաջողության հասնելու՝ պետք է գա ու միանա։ Արդեն հոգնել ենք ստատուսով պայքարողներից։ Իջեք փողոց, պատասխանատվություն ստանձնեք ու պայքարեք ժողովրդի հետ։ Պետք է լայն համախմբում»,- ասաց Իշխան Սաղաթելյանը։

Նա նկատեց, որ երբ ժողովուրդն ասում է, թե ուր է ընդդիմությունը, դա ընդունելի է, բայց երբ քաղաքական գործիչներն են դա անում՝ անհասկանալի է։

«Բա դուք էլ եք քաղաքական գործիչ, ուժ, դուք կանգնենք ժողովրդի կողքին»,- նշեց Սաղաթելյանը՝ հավելելով, որ բոլորը կարող են գալ համախմբման շարժմանը միանալու․ «Ուրախ կլինենք տեսնել հարթակում»։