Նոյեմբերի 9-ը դատավճիռ չէ․ գնդակը Հայաստանի դաշտում է՝ պետք է համախմբել ժողովրդի ներուժը. Իշխան Սաղաթելյան

Այսօր կա 2 տեսակետ․ մի տեսակետի հեղինակն իշխանությունն է, որն ասում է, թե նոյեմբերի 9-ին կապիտուլյացիայով ավարտված պատերազմը դատավճիռ է, և չունենք ռեսուրս՝ իրավիճակից դուրս գալու, այդ պատճառով էլ ժողովրդին տանում են խաղաղության, ըստ էության, զիջելով հայրենիքի մի մասը։ 

Եվ կա երկրորդ տարբերակ՝ պայքարի օրինակ․ նոյեմբերի 9-ը դատավճիռ չէ։ 

Այս մասին ասուլիսի ժամանակ հայտարարեց ԱԺ ընդդիմադիր պատգամավոր, «Դիմադրություն» շարժման համակարգող Իշխան Սաղաթելյանը։ 

Նա նկատեց, որ պետք է մոբիլիզացնել բոլոր ուժերն ու ցույց տալ, որ Հայաստանն ու Արցախը չեն հանձնվել, կան բոլոր հնարավոր ռեսուրսները՝ հայրենիքի պաշտպանության գործին լծվելու համար։

«Այն, ինչ երեկ տեղի ունեցավ Արցախում, պատմական իրադարձություն էր։ Այն արժեքավոր արձանագրում էր՝ ի լուր ամբողջ աշխարհի։ Արցախում բոլորը՝ խորհրդարանական ուժերը, ժողովուրդը հայտարարեցին, որ Արցախը չի եղել ու չի լինելու Ադրբեջանի կազմում»,- ասաց Սաղաթելյանը։

Նա նաև նշեց, որ Արցախում տեղի ունեցած հանրահավաքը նաև այն մասին էր, որ որևէ իշխանություն չի կարող ստորագրել որևէ փաստաթուղթ՝ Արցախի ինքնիշխանությունը սահմանակցելու և բռնակցելու նպատակով։

Սաղաթելյանի խոսքով՝ Արցախը նաև կոչ արեց Հայաստանին կանգնել իրենց կողքին։

«Հիմա գնդակը Հայաստանի դաշտում է»,- ասաց Սաղաթելյանը։

Նա նշեց, որ նոյեմբերի 5-ի հանրահավաքը լինելու է ընդդիմության արձագանքը։