Ադրբեջանի իշխանությունն այլևս անզոր է

Իրանի նկատմամբ պատժամիջոցների վերացումից հետո նավթային հիմքով տնտեսություն ունեցող պետությունները հայտնվել են ծանր պայմաններում: Դրանցից է նաև նավթային գումարներով հոխորտացող Ադրբեջանը: Այսօր առավոտյան ադրբեջանական նավթի գինը իջել է 28.8 դոլլար մեկ բարելի դիմաց: Նավթի և մանաթի առժեզրկումից դեռ ուշքի չեկած ադրբեջանական տնտեսությանը սպասվում է հերթական ծանր հարվածը: Այսօրվանից Իրանին հնարավորություն է տրվել էներգետիկ ռեսուրսներն արտահանել միջազգային շուկա: Տարբեր տեղեկություններով Իրանն օրական արտահանելու է 500 հազարից մինչև 2.5 մլն բարել նավթ, որն, առանց այն էլ նավթի այսպիսի գնանկման ժամանակաշրջանում, ավելի է նպաստելու նավթի գնանկմանը:

Սեփական տնտեսության և բյուջեի համար մեկ բարել նավթը 50 դոլլար հաշվարկած ադրբեջանցի տնտեսագետները կանգնել են անելանելի խնդիրների դիմաց: Բոլորին պարզ է դարձել, որ Բաքվի բռնապետական վարչակարգը հայտնվել է սուր ֆինանսական և քաղաքական ճգնաժամի մեջ: Մի կողմից իրանական նավթի մուտքը շուկա ավելի է ցածրացնելու նավթի արժեքը, մյուս կողմից նույն Իրանի նկատմամբ պատժամիջոցների վերացումը հնարավորություն է տալու Իրանին հզորանալ և ավելի ակտիվ մասնակցել տարածաշրջանային խնդիրների լուծմանը:

Մինչ այս Իրանի հետ ոչ այնքան բարիդրացիական հարաբերություններ ունեցող Ադրբեջանը, որ տարբեր ոլորտներում ամուր համագործակցում էր Թուրքիայի, Սաուդիան Արաբիայի, Իսրայելի և սրանց մյուս արբանյակ պետությունների հետ, այսօր հայտնվել է «արթնացող առյուծի» դեմ դիմաց: Դժվար թե սրանից հետո ադրբեջանական իշխանությունները քաջություն ունենան բարձրաձայն արտաբերել «Հարավային Ադրբեջան» բառակապակցությունը, որն ըստ իրենց, Իրանի հյուսիս-արևմտյան մասն է` Թավրիզ կենտրոնով:

Այնպես որ, շատ հետաքրքիր ժամանակներ են սպասվում սեփական բանակի և տնտեսության վերաբերյալ մեծ կարծիք ունեցող ադրբեջանական իշխանություններին: Հարկավոր է նոր մեթոդներ մտածել ամեն ինչից դժգոհ սեփական ժողովրդի ընդվզումները կանխելու և իշխանությունը պահելու համար: