Ադրբեջանցիները ռուսներին ստում են, իսկ մենք բաց ենք, ազնիվ՝ մեր բոլոր գործընկերների հետ, ամեն տեղ ասում ենք նույնը․ Ալեն Սիմոնյան

Ռուսաստանն ասում է՝ Ադրբեջանը նույնպես դաշնակից է, բայց, ԱԺ նախագահ Ալեն Սիմոնյանի համոզմամբ, դա ճշմատություն չէ։

«Ադրբեջանի իշխանությունները ռուս գործընկերներին ստում են, խաբում են՝ բոլոր հնարավոր ձևերով»,- ԱԺ լրագրողների հետ զրույցում ասաց Ալեն Սիմոնյանը։

Նա նկատեց, որ միջազգային հանդիպումների ժամանակ Ադրբեջանի ներկայացուցիչներն ամենաբարձր մակարդակով Հայաստանի իշխանությանը մեղադրում են ռուսամետ լինելու մեջ, իսկ Մոսկվայում՝ Ադրբեջանի ղեկավարը և ներկայացուցիչները հայկական կողմին մեղադրում են եվրոպամետ և ամերիկամետ լինելու մեջ:

«Դա ադրբեջանական աշխատելաոճն է: Իսկ մենք բաց ենք, ազնիվ ենք մեր բոլոր գործընկերների հետ, ամեն տեղ ասում ենք նույնը»,- ասաց Ալեն Սիմոնյանը։

Պատասխանելով լրագրողի հարցին ու արձագանքելով ՔՊ-ական պատգամավոր Գագիկ Մելքոնյանի հայտարարությանը, թե Կրեմլն ուզում է Ադրբեջանին միջանցքը տալ, Ալեն Սիմոնյանը նշեց, որ այս հարցի շուրջ մեկնաբանությունները տարբեր են։

«Կան տարբեր մեկնաբանություններ, որովհետև գործընթացն ավարտին հասցված չէ, կա նոյեմբերի 9-ի հայտարարությունը, որը ՀՀ-ի համար շատ կարևոր է: Ճիշտ է, դա որակվել է որպես պարտության արձանագրում, բայց, այնուամենայնիվ, կան արձանագրված կետեր, օրինակ, Լեռնային Ղարաբաղի կոնֆլիկտի գոյությունը, Լաչինի միջանցքի գոյությունը, որևիցե այլ միջանքի բացակայությունը, կա նաև դրան հետևող 2021 թվականի հունվարի 11-ի հայտարարությունը, որը նույնպես Ռուսաստանի անմիջական աջակցությամբ է արվել, որոնք այսօր շատ հիմնարար փաստաթղթեր են Հայաստանի համար»,- ասաց Ալեն Սիմոնյանը։