Գեներալ Մանվելն առաջինը կլքի Սերժ Սարգսյանին

Չկա բողոք, նշանակում է «գրողի ծոցն» է ուղարկվում հանցագործությունը: Խոսքը մոտ 20 օր առաջ Էջմիածնում Մանվել Գրիգորյանի կողմից նախկին քաղաքապետին ծեծի ենթարկելու մասին տարածված տեղեկատվությանն է: Էջմիածնում բոլորը գիտեն, որ Մանվել Գրիգորյանի ավտոշարասյան դիմաց դուրս եկող ավտոմեքենայի վարորդը Մանվելի կամ իր «վկաների» կողմից և կծեծվի, և մեքենան կվնասեն: Գոնե էջմիածինցիները լավ գիտեն, Մանվել Գրիգորյանն իր կողմից սահմանված «կարգին» դեմ գնացողների հետ հաշվեհարդար է տեսնում, ինչպես ասում են անհնազանդներին Մանվելը չի ներում, ինչպես որ չի ներել իր եղբոր որդիներ Հրանտ և Զարզանդ Գրիգորյաններին: Թերևս այս հանգամանքով էր պայմանավորված նախկին քաղաքապետի հետնահանջը, ով սկզբից հայտարարեց, թե Մանվելի հետ հարցերը կլուծի իր ապրած կյանքով ու գործողություններով, բայց հետո փոշմանեց ու չբողոքեց: Կամ էլ հասկացավ, որ բողոքի դեպքում Մանվելի ու իր թիկնապահների կողմից վտանգն ու սպառնալիքն ավելի մեծ կլինի, քան պաշտպանության երաշխիքը:

Բայց սրանով Մանվել Գրիգորյանի վատ սովորությունը չի վերջանում: Էջմիածնում, ինչպես կասեր «դասականը», մեխն էլ, չագուչն էլ, նալն էլ իր ձեռքում է: Պարզվում է` իր տիրապետության տակ գտնվող տարածքում Մանվելը տնտեսական լայն գործունեություն է ծավալում, բայց հարկեր չի վճարում: Ըստ հրապարակումների` միայն Արմավիրի մարզի Արշալույս գյուղում սեփականության կամ օգտագործման իրավունքով Մանվել Գրիգորյանը 30-ից ավել անշարժ գույք ունի`շոգեբաղնիքից մինչև ռեստորան: Մոտ այդքան անշարժ գույք էլ պատգամավորն այլ անձանց անուններով է գրանցել:

Մանվել Գրիգորյանն ու նրա մերձավորները բիզնեսներ, թանկարժեք առանձնատներ ունեն ոչ միայն Արշալույսում: Էջմիածին քաղաքի վերջնամասում երկհարկանի շքեղ առանձնատուն ունի Մանվել Գրիգորյանի որդին` Էջմիածնի քաղաքապետ Կարեն Գրիգորյանը: Մյուս որդին՝ Արման Գրիգորյանը, փող է աշխատում Էջմիածին-Երեւան մասնավոր տաքսիներից: Նա է հսկում այդ «գիծը» և աշխատող տաքսիներից ամեն օր, ըստ որոշ լուրերի, իր բաժին «նալոգն» է հավաքում: Էջմիածնում Մանվել Գրիգորյանին է պատկանում քաղաքի շուկան, հագուստի վաճառքի տոնավաճառը, խանութներ, վարձակալությամբ տրված տարածքներ: Որպես կանոն Էջմիածնում լուրջ պայմանագրերի առյուծի բաժինը կնքվում է  հենց Մանվել Գրիգորյանի ընկերության հետ, որտեղից էլ ստացվում է գեներալի հիմնական եկամուտը:

Փաստորեն, քաղաքական իշխանության թույլտվությամբ մի ամբողջ քաղաք իր հարակից գյուղերով Մանվել Գրիգորյանը վերածել է ֆեոդալական կալվածքի: Ժամանակին Մանվել Գրիգորյանին ԿՌԱԶ-ից բացի ոչինչ չէին վստահի: Այսօր նրան անգամ պատգամավորի մանդատ են վստահել: Եվ ամեն օր Մանվելի տեսակը ավելի է ամրանում, իսկ իշխանությունն էլ այդ տեսակին իր քաղաքական հենարանն է համարում, չնայած որ Մանվել Գրիգորյանն համարվում է քաղաքական դաշտի ամենաթափառաշրջիկ խաղացողներից: Քաղաքական լարված պահերին Մանվելը միշտ էլ իջել է ջրի հատակը, մինչև անցել է վտանգը: Եվ չի բացառվում, որ, կախված իրավիճակից, Մանվելն առաջինը կլքի Սերժ Սարգսյանին, ինչպես դա արեց Լևոն Տեր- Պետրոսյանի, Վազգեն Սարգսյանի եղբոր և Դեմիրճյանի դեպքում: Քաղաքական «առնետավազքի» մրցավազքում Մանվելը չի զիջում ոչ Արթուր Բաղդասարյանին, ոչ էլ Արտաշես Գեղամյանին: Նրա շնորհիվ ԵԿՄ-ն այսօր օեկացվել է:

Մանվելին անդրադարձ չէր արվի, եթե նրա կողմից նախկին քաղաապետին ծեծելու լուրերին զուգահեռ չհնչեր բոթը` հակառակորդի կրակոցից սահմանին 20 ամյա զինվոր է մահացել: Զինվոր, ով իր կյանքի գնով ուզում է երկրի սահմանն անառիկ պահել, որ թիկունքն ամուր լինի: Իսկ թիկունքում զինվորի կյանքի գնով կալվածքներ են ստեղծում, իրար «միս են ուտում» ու մարդ ծեծում, «փայ մտնում» բաժան –բաժան անում, և ամեն մեկն իր սարն ու իր ծառն է գծում: Իսկ ե՞րբ է ասվելու` վերջ «մանվելիզմին», վերջ այս տեսակին: