680 հազարին խոստացել էին Շուշի և Հադրութ և ոչ սեպտեմբերի 13, 200-ից ավելի նոր զոհ. Գեղամ Նազարյան

Ամեն ինչ սկսվեց ասֆալտին փռելու, պատերին ծեփելու սպառնալիքներից, կաթողիկոսի դեմ ուղղված ստոր գործողություններից, բանակի հրամանատարական կազմին վարկաբեկելու համառ և ժրաջան փորձերից, սեփական կետից բանակցելուց և դիվանագետներին օտարի կոշիկը լիզելու մեջ մեղադրելուց։ Այս մասին ԱԺ-ում հայտարարությունների ժամին իր ելույթում ասաց «Հայաստան» խմբակցության պատգամավոր Գեղամ Նազարյանը։

«Հետո եղավ աղետը, արհավիրքը, այն ավելի դաժան էր լինելու, եթե չլիներ հայ զինվորի կամքը, խիզախություն ու քաջությունը:

Ցավն ու ողբերգությունն այն է, որ մենք չշրջեցինք պարտության էջը և չթեւակոխեցինք վերականգնման անհրաժեշտ փուլ: Որոշեցինք անհեթեթ և կործանարար փորձարկում իրականացնել, որը աշխարհը չէր տեսել: Նույնիսկ մայիսի 12-ի, նոյեմբերի 16-ի, սեպտեմբերի 13-ի իրադարձություններից հետո անհրաժեշտ հետևություններ չարվեց: Ավելին, նույն անձնավորությունը, որ դեռ մինչև պատերազմը սկսել էր հայ զինվորին վարկաբեկելու գործը, հայտարարեց, թե պատերազմի ժամանակ հզոր զենքերից պլատաներ են գողացել, իսկ հետո հայ ազգի բարեկամ Զատուլինի մուտքը Հայաստան համարվեց անցանկալի:

Հերիք է, բավական է, սթափվեք, կանգ առեք, վերջապես հասկացեք՝ մուրալով, աղերսելով, ծնկի գալով խաղաղություն չեն ստանում, մոռացեք դրա մասին: Այս մասին ԱԺ-ում հայտարարությունների ժամին իր ելույթում ասաց «Հայաստան» խմբակցության պատգամավոր Գեղամ Նազարյանը։

Նա ընդգծեց, որ խաղաղության հասնում են արժանապատիվ պահվածքի, կեցվածքի, դրան ուղղված քայլերի, գործողությունների արդյունքում. «Միայն խելագարն ու խելացնորն է երազում պատերազմի մասին, բայց նույնպիսի խելագարություն է ակնկալել, որ, ծնկի գալով, խաղաղություն կստանաս։ Եթե մենք չսաթփվենք, համապատասխան և անհրաժեշտ քայլեր չձեռնարկենք, մեզ ոչ մի ստորագրված համաձայնագիր, պայմանագիր արժանապատիվ խաղաղություն չի տալու, հանգիստ և ապահով կյանք չի տալու։

Հասկացեք և ընդունեք, գիտակցեք, որ թշնամին Արցախով, Սյունիքով Գեղարքունիքով, Վայոց ձորով չի բավարարվելու, եթե մենք շարունակենք մեզ այսպես պահել։ Մենք անդադար մնալու ենք 2020 թվականի նոյեմբերի 9-ի ցուրտ և մռայլ օրվա մեջ, քանի դեռ չենք փոխել պարտության դեմքին։ Սա առաջին, բայց ոչ միակ քայլն է վերականգնման, այս իրավիճակից դուրս գալու համար։

Ասում են՝ իսկ 680 հազարը... 680 հազարին խոստացել էին Շուշի և Հադրութ և ոչ սեպտեմբերի 13, 200-ից ավելի նոր զոհ»,- ասաց Գեղամ Նազարյանը։