Սա աչքալուսանք էր Ադրբեջանին և Թուրքիային. Ագնեսա Խամոյանը՝ Զատուլինի արգելքի մասին

Հայ-ռուսական հարաբերությունների մասին ընտանեկան թերթով գաղտագողի անհեթեթ ծանուցումներ տվող, երկիրն առհասարակ թերթով ղեկավարող «հավաստի աղբյուրն» այսօր ի լուր աշխարհի հայտարարել է, որ արգելվում է ՌԴ ԱՊՀ գործերի, եվրասիական ինտեգրման եւ հայրենակիցների հետ կապերի հանձնաժողովի նախագահ Կոնստանտին Զատուլինի մուտքը Հայաստանի Հանրապետություն: Այս մասին ԱԺ-ում հայտարարությունների ժամին իր ելույթում նշեց ԱԺ «Հայաստան» խմբակցության պատգամավոր Ագնեսա Խամոյանը:

Նա, մասնավորապես, նշել է. «Մարդու, ով միշտ աչքի է ընկել բացառապես իր հայամետ դիրքորոշումներով: Մարդու, ում մուտքը դեռ տարիներ առաջ արգելվել է Ադրբեջան՝ Արցախ այցելելու և Ղարաբաղյան հակամարտությունում հայանպաստ դիրքորոշումներով հանդես գալու համար:

Սա աչքալուսանք էր Ադրբեջանին և Թուրքիային, որի քաղաքացիներն անարգել մուտք են գործում Հայաստան, պղծում Ցեղասպանության հուշահամալիրը, որի պաշտոնյաները, որոնք բազմիցս հանդես են եկել ՀՀ ինքնիշխանության և տարածքային ամբողջականության դեմ հայտարարություններով, բայց Հայաստանի օրվա իշխանությունների կողմից չեն հռչակվել անցանկալի անձ, այլ ճիշտ հակառակը՝ արժանացել են նրանց բարեհաճությանը և իրականացրել բաց դռների քաղաքականություն:

Ի դեպ, Կոնստանտին Զատուլինը հեղինակել է ՌԴ պետդումայի 1995թ. որոշումը, որից հետո Պետդումայի կողմից ճանաչվել է Հայոց ցեղասպանությունը: Հետևողականորեն հայ-ռուսական հարաբերությունները փչացնող օրվա իշխանությունը բացառապես սեփական իշխանության շահերից է մեկնաբանում դաշնակից Ռուսաստանի խորհրդարանի պատգամավորի խոսքերը և անտեսում նրա հայամետ դիրքորոշումը, քանզի «հավաստի աղբյուրին» բացառապես սեփական աթոռն է հետաքրքրում, այլ ոչ երկրի շահը: Թեպետ, ի գիտություն ձեզ, պարոն Զատուլինն արդեն հայտարարել է, որ Հայաստանի իշխանությունների հիստերիկ որոշումները չեն ազդելու իր հայանպաստ դիրքորոշման և գործունեության վրա»: