Ի՞նչու եք ընտրել այդ դպրոցը, եթե այն նոր է վերանորոգվել ու նույն թաղամասում դրանից վատ վիճակում գտնվող այլ դպրոց կա․ ՔՊ-ականը՝ փոխնախարարին (տեսանյութ)

Խորհրդարանում քննարկվում է կրթության ոլորտի հերթական դրամաշնորհային համաձայնագրի հաստատումը։ Նախարարությունից խոստանում են, որ այս ծրագրով բարեփոխումներ կիրականացնեն։ Քննարկման ժամանակ հիմնական զեկուցող ԿԳՄՍ փոխնախարար Արթուր Մարտիրոսյանը տեղեկացրեց, որ վարկը մարվելու է 14,5 տարի հետո, իսկ մինչ այդ միայն կվճարվեն տոկոսները։

Արթուր Մարտիրոսյանը տեղեկացրեց նաև, որ այդ վարկի շրջանակում կվերանորոգվի մի քանի դպրոց, այդ թվում նաև՝ Երևանի Կարեն Դեմիրճյանի Թիվ 139 դպրոցը։

ՔՊ-ական Հակոբ Ասլանյանը նկատեց, որ հիշյալ դպրոցը նոր է վերանորոգվել և բավականին լավ վիճակում է գտնվում, մինչդեռ նույն թաղամասում կան անմխիթար վիճակում գտնվող այլ դպրոցներ, որոնք իսկապես բարեկարգման կարիք ունեն։ Նա հարց ուղղեց հիմնական զեկուցողին․ «Ինչո՞ւ նախապատվությունը տվեցիք արդեն վերանորոգված դպրոցին, ի՞նչ սկզբունքով եք կատարում դպրոցների ընտրությունը, եթե այդ դպրոցից ավելի վատ վիճակում գտնվող այլ դպրոցներ կան ու անտեսվել են»։

Նրա այս հարցին Արթուր Մարտիրոսյանն ըստ էության չպատասխանեց՝ պարզապես նշելով, թե էլի դպրոցներ կան, որոնք կվերանորգվեն։ Սակայն նրա այս կիսատ-պռատ պատասխանը հավանաբար գոհացրեց ՔՊ-ականին ու, նոր հարցադրման փոխարեն, իշխող ուժի պատգամավորը պարզապես շնորհակալություն հայտնեց իշխանության ներկայացուցչին։

Մանրամասները՝ տեսանյութում