Նիկոլ Փաշինյանի հարսանիքի քավոր մարզպետի գլխավորած ջոկատը Արցախ չի մեկնել. Ոսկան Սարգսյան

Նիկոլ Փաշինյանի հարսանիքի քավոր մարզպետի գլխավորած ջոկատը Արցախ չի մեկնել: Այս մասին ֆեյսբուքյան իր էջում գրել է լրագրող Ոսկան Սարգսյանը:

«2տարի առաջ՝ 2020թ․ հոկտեմբերի 21-ին Նիկոլ Փաշինյանը դիմեց բոլոր հայ տղամարդկանց, նրանց կոչ անելով զենք վերցնել և մեկնել Արցախ։ Առաջիններից մեկն այդ կոչին արձագանքեց նրա դասընկեր,նրա հարսանիքի քավոր, Փաշինյանի կողմից 2019թ․ սեպտեմբերի 12-ին Իջևան համայնքի ղեկավարի պաշտոնակատար նշանակված Հայկ Ղալումյանը , ով հետևյալ կոչով դիմեց իր հայրենիցներին․ «Հայրենիքի պաշտպանության սրբազան առաքելության համար ստեղծվում է «Իջևան» կամավորական ջոկատ: Հայրենիքի առջև իմ սուրբ պարտքը կատարելու համար առաջինն եմ կամավորագրվում այս ջոկատին:

Կոչ անում բոլորիդ` համախմբվել և միասին կերտել մեր նորօրյա հաղթանակը: Վստահ եղեք, որ մենք առաջնագիծ ենք մեկնում մեր վերջնական ու անշրջելի հաղթանակն ամրագրելու համար»: Այդ ջոկատը մի քանի օր Տավուշի մարզում վարժանքների մասնակցելուց հետո Արցախ չմեկնեց, նաև չմեկնեց Տավուշի սահմանագոտին պաշտպանելու։ Այդ կապակցությամբ տեղեկատվական հարցում եմ ուղարկել 2021թ․ ապրիլի 8-ին Տավուշի մարզպետ նշանակված Հայկ Ղալումյյանին, որի պատասխանում նշված է․ ««Իջևան» կամավորական ջոկատ ստեղծելու վերաբերյալ 2020թ. հոկտեմբերի 22-ին սահմանների պաշտպանության համար կոչով դիմել եմ բնակչությանը: Կամավորական սկզբունքով կազմավորվել է ջոկատ, որը հանդերձավորվել, սպառազինվել և անցել է նախապատրաստական վարժանքներ X զորամասում: Կամավորական ջոկատի կիրառման բոլոր հարցերը կոորդինացվել են ՀՀ պաշտպանության նախարարության համապատասխան ծառայությունների կողմից: Ծառայության համար իմ կողմից ստացված ամբողջ գումարը փոխանցվել է «Հայաստան» համահայկական հիմնադրամին»։

Արցախ մեկնելու համար կամավորագրվածներից մեկը,որի անունը հարկ չենք համարում հրապարակել, հայտնեց հետևյալը․ «Ես էլ եմ այդ գումարտակում եղել, մի 5-6 օր գնացինք- պարապեցինք, որ պետք է տանեն Տավուշի դիրքեր։

Հետո ասացին՝ գնացեք ձեր տներում պատրաստ սպասեցեք, մենք կկանչենք, այդպես էլ չկանչեցին ։ Հետո երկու ամսվա համար մի 200 հազար դրամ փող տվին, չգիտեմ՝ ինչի՞ համար»։ Իջևանի քաղաքի բնակիչը, ով 2020-ի պատերազմի ժամանակ Արցախում մարտնչել է , դժգոհեց, որ իրեն դրա դիմաց 40 հազար դրամ են վճարել։ Նոյեմբերյանի գնդի պայմանագրային զինծառայողները, ովքեր 2020թվականի պատերազմի ժամանակ Արցախում են եղել, դժգոհեցին, որ իրենց դրա համար ՊՆ-ն գումար չի վճարել»,- գրել է Ոսկան Սարգսյանը։