Արցախի ապագան առանց ՌԴ երաշխավորության, ես այլևս չեմ պատկերացնում․ Արայիկ Հարությունյանն ավելի վստահելի երաշխիքներ է ակնկալում ՌԴ-ից

Մենք պետք է գիտակցենք, թե ինչ խնդիրներ ունենք՝ կապված գազի մատակարարման, հոսանքի ու կապի անխափան աշխատանքի հետ։ Այս մասին Արցախի Հանրային հեռուստատեսությանը տված հարցազրույցում ասել է Արցախի Հանրապետության նախագահ Արայիկ Հարությունյանը:

Նա նշեց, որ առանց խաղաղապահների, հիշյալ խնդիրների լուծման համար որևէ տիպի շփում տեղի չի ունենում։

Ինչ վերաբերում է քաղաքական խնդիրներին, ապա Արայիկ Հարությունյանը նկատում է, որ դեռ որևէ հստակեցում չկա։

«Պետք է գնահատենք՝ ինչ է տալու մեզ Բաքվի հետ ուղիղ բանակցությունները։ Եթե դրանով մենք կարող ենք պահել մեր դե ֆակտո անկախությունն ու կայունությունը, ապա պարտավոր ենք բանակցել՝ չզիջելով մեր ինքնորոշման իրավունքը և կասկածի տակ չդնելով մեր անկախության ճանապարհը»,- նշեց Արցախի նախագահը։

Նրա խոսքով՝ դեռ պետք է քաղաքական ուժերով որոշում կայացնեն՝ արդյոք ընդունում են այդ առաջարկությունները, ինչ լիազորություններ են ունենալու բանակցողներնը կամ այդ հանդիպման մասնակիցները։

Հարցին՝ ինչպե՞ս է գնահատում ռուս խաղաղապահների գործունեության արդյունավետությունն Արցախում, Հարությունյանն ասաց. «Նախ պետք է շնորհակալություն հայտնել Ռուսաստանին և Ռուսաստանի ղեկավարությանը նախագահի գլխավորությամբ, որ կանխել են պատերազմի շարունակությունը, որը մեզ համար անդառնալի հետևանքներ կարող էր ունենալ։

Ընդհանուր առմամբ, Արցախի ապագան առանց Ռուսաստանի ներկայության որպես խաղաղապահ զորակազմ, թե այլ առաքելություն, ես չեմ պատկերացնում։ Այո, մեզ համար անկախությունն է գլխավորը, ազգերի ինքնորոշման իրավունքը, բայց առանց Ռուսաստանի երաշխավորման ես չեմ պատկերացնում»,- ասաց Արայիկ Հարությունյանը։

Նա հույս ունի, որ շուտով կհասնեն մինչպատերազմյան շրջանի ցուցանիշներին և Արցախի ապագան կապում է Ռուսաստանի հետ։

«Արցախի ապագան առանց ՌԴ երաշխավորության, ես չեմ պատկերացնում»,- ասաց Արցախի նախագահը։ 

Միևնույն ժամանակ Արայիկ Հարությունյանը նկատում է, թե կարող է հարց առաջանալ այն առումով, որ նախկինում Արցախի անվտանգության երաշխավորը հանդիսանում էր Հայաստանը։ Սակայն այսօր արդեն, ըստ Հարությունյանի, այլ իրավիճակում է Արցախը։

«Գիտեք, կոնֆլիկտն արդեն Հայաստան-Ադրբեջան կամ Արցախ- Ադրբեջան չէ։ Ցավոք, վաղուց, կոնֆլիկտը շատ ավելի խորն է։ Կա Ադրբեջանի և Թուրքիայի միջև Շուշիի հռչակագիր, և այս պատերազմի ընթացքում Թուրքիայի դերակատարությունը քաղաքական պրոցեսներում...

Տարածաշրջանում վաղուց արդեն Թուրքիայի դերակատարությունը շատ ավելին է, քան կար մինչև 44-օրյա պատերազմը, դրա համար ոչ միայն խաղաղապահ առաքելություն ենք պատերացնում Ռուսաստանի կողմից, այլ ավելի վստահելի երաշխիքներ ենք ակնկալում ՌԴ կողմից»,- ասաց Հարությունյանը։