Այսօր Բարեկենդան է, որ կոչվում է նաև փրկության պահք

Այսօր հայ առաքելական եկեղեցին նշում է Բարեկենդան առաջավորաց պահոց տոնը, որով կազդարարվի առաջին 5-օրյա պահքը։

Այս տոնը և պահքը հատուկ է միայն Հայ եկեղեցուն և սկսվում է Մեծ պահքից 3 շաբաթ առաջ և պահանջվում է խիստ պահեցողություն:

Բարեկենդան (բառացի՝ բարի կենդանություն, ուրախություն), գլխավոր շաբաթապասերին նախորդող շաբաթ օրը։ Եկեղեցին այդ օրը քահանայական դասին և հավատացյալ ժողովրդին արտոնում է ճոխ սեղան և զվարթություն՝ հաջորդող պահքը ուրախ սրտով մտնելու և երկարատև պահոց օրերին դիմակայելու համար։ Հայ եկեղեցում օրացույցում նշվում են մի շարք բարեկանդաններ. Բարեկենդան Վարդավառի պահոց, Բարեկենդան Աստվածածնի պահոց, Բարեկենդան ս. Խաչի պահոց, Բարեկենդան ս. Գրիգոր Լուսավորչի պահոց, Բարեկենդան Առաջավորաց պահոց, Բարեկենդան Եղիական պահոց ևն։ Հայ եկեղեցին առանձնակի ճոխությամբ նշում է հատկապես Բուն Բարեկենդանը։

Հնում, այդ օրերին թույլատրվել է միայն աղ ու հաց ուտել, արգելվել է Սբ պատարագ մատուցել: Առաջավորաց պահքի խորհուրդն է՝ հեթանոսական ապականությունից մարդկային 5 զգայարանների սրբում: Հնում սովորույթ կար մկրտությունից առաջ 5 օր ծոմ պահել: Սբ Գրիգոր Լուսավորիչը նույնպես հրամայում է Տրդատ թագավորին և մյուսներին մկրտությունից առաջ 5 օր ծոմ պահել, որի շնորհիվ էլ Տրդատը և ուրիշներ փրկվում են այսահարությունից (դիվահարությունից): Այդ պատճառով էլ առաջավորաց պահքը կոչվում է նաև փրկության պահք:

Առաջավորաց պահքին հաջորդող շաբաթ օրը Հայ եկեղեցին տոնում է Սբ Սարգսի տոնը: Այս տարի այն կնշվի հունվարի 23-ին։